VHP Rusiyanı Krım işğal cəhdində ittiham edir

Vətəndaş Həmrəyliyi Partiyası (VHP) Krımda baş verən hadisələrlə bağlı etiraz bəyanatı yayıb.

Müəlliflər Ukraynada baş verən proseslərin bütün dünyada ciddi narahatlıq yaratdığını qeyd edirlər. Rusiyanın təzyiqləri Ukraynanın suverenliyinə, ərazi bütövlüyünə yönələn əməl kimi dəyərləndirilir. Bu davranışın həm də Avropaya inteqrasiya yolu seçən digər postsovet ölkələri üçün təhlükə yaratdığı vurğulanır.

Rusiya silahlı qüvvələrinin Krıma yerləşdirilməsi hərbi-siyasi vəziyyəti gərginləşdirmək cəhdi kimi yolverilməz sayılır. Müəlliflər beynəlxalq birliyi Ukraynanı bölmək, yenidən Rusiyanın nəzarətinə almaq istəməsi cəhdlərinə qarşı daha sərt şəkildə müqavimət göstərməyə çağırırlar. Sənəddə Ukraynanın bölünməsi cəhdləri Azərbaycan, Gürcüstan və Moldovada başlayan separatizmin davamı adlandırılır. “Biz Ukraynanın bölünməsi cəhdlərini qətiyyətlə pisləyir, Ukrayna xalqının Avropaya inteqrasiya seçimini dəstəkləyirik”, - deyə müəlliflər mövqelərini ifadə edirlər.

Ukrayna ətrafında baş verən olaylara, xüsusilə, Krımın taleyinə Azərbaycan xalqının səssiz qalmaması çağırışı edilir. Krım muxtar respublikasında yaşayan Krım tatarlarının soy-kökü etibarı ilə Azərbaycanla bağlı olduğu vurğulanır. Zaman-zaman rus-sovet imperiyasının repressiya və deportasiyasına məruz qalan Krım türklərinin yenidən eyni tale ilə üz-üzə qaldığı xəbərdarlığı edilir.

Müəlliflər Ukraynanın ərazi bütövlüyünü dəstəkləməklə azadlıq və demokratiya uğrundakı mübarizədə Krım türklərinin, bütövlükdə Ukraynanın qələbəsinə inandıqlarını bəyan edirlər. -05D-