Xarici İşlər Nazirliyi: Azərbaycan Ermənistanla ikitərəfli danışıqlara hazırdır

Bakı/21.11.23/Turan: Azərbaycanın sülh müqaviləsi layihəsilə bağlı təkliflərinə Ermənistanın cavab verməsinin 2 ay yarım müddət çəkməsi prosesi ciddi şəkildə yubadıb, Azərbaycan Xarici İşlər Nazirliyinin 21 noyabr tarixli məlumatında deyilir.

“Sülh danışıqlarındakı bu durğunluq regionda sabitliyə və firavanlığa töhfə vermir”, - sənəddə qeyd olunur.

Azərbaycan sülh müqaviləsinin mümkün qədər tez tamamlanması üçün Ermənistanla ikitərəfli əsasda birbaşa danışıqlara hazırdır.

“Biz inanırıq ki, iki ölkə gələcək münasibətləri barədə qərarı birlikdə verməlidir”, - məlumatda deyilir.

Qarşılıqlı məqbul məkanın seçilməsi və ya dövlət sərhədində görüş barədə qərar verilməsi də daxil olmaqla, sülh prosesinin davam etdirilməsinə görə iki ölkə məsuliyyət daşıyır.

“Biz Ermənistan tərəfini yeni lüzumsuz yubatmalara yol verməməyə çağırır və danışıqların tezliklə başlanması üçün onların bu çağırışa müsbət cavab verəcəyinə ümid bəsləyirik”, - Xarici İşlər Nazirliyinin şərhində deyilir.

Qeyd edək ki, Azərbaycan Xarici İşlər Nazirliyinin bu məlumatı Yerevanın sülh müqaviləsilə bağlı təkliflərini Azərbaycana təqdim etdiyini bildirməsindən bir neçə saat sonra yayılıb.- 06B-