Xələf Xələfov: “Keşikçidağ” Azərbaycan ərazisinə aiddir”

Bakı/16.07.19/Turan: Azərbaycanla Gürcüstan arasında dövlət sərhəddinin delimitasiyası üçün hər hansı dini-mədəni və s. qeyri-hüquqi faktlar əsas təşkil edə bilməz. Bu barədə Azərbaycan xarici işlər nazirinin müavini, prezidentin sərhəd və Xəzər dənizi məsələləri üzrə xüsusi nümayəndəsi Xələf Xələfov bildirib.

"Keşikçidağ mağaralar kompleksini əhatə edən sahə bütün mövcud hüquqi sənədlər, faktiki istifadə vəziyyətinə görə hər zaman Azərbaycan ərazilərinə aid olub. Bu, eyni zamanda hələ 1963-cü ildə Gürcüstan SSR Ali Soveti tərəfindən təsdiq edilmiş topoqrafik növbətçi xəritələrdə öz əksini tapıb və SSRİ-nin süqutuna qədər tərəflər arasında inzibati sərhəd kimi qəbul edilib. Buna görə də hüquqi baxımdan qeyd edilən sahə ilə bağlı hər hansı mübahisədən və ya iddiadan söhbət gedə bilməz. Eyni zamanda, bu sahə də razılaşdırılmayan digər sahələr kimi delimitasiya çərçivəsində razılaşdırılmalı, iki dövlət arasında imzalanacaq dövlət sərhəddinə dair müqavilədə təsbit olunmalıdır", - AzərTAC X.Xələfovdan sitat gətirib.

O, iyulun 14-də bir qrup şəxsin azərbaycanlı sərhədçilərə hücumunu "Azərbaycan Respublikasının suverenliyinə və ərazi bütövlüyünə yönəlmiş təxribat xarakterli cinayət əməli" kimi xarakterizə edib.

X.Xələfov güman edir ki, bu insidentin Gürcüstan hökumətilə əlaqəsi yoxdur.

Bununla yanaşı o qeyd edib ki, Gürcüstan sərhədçiləri öz hərəkətsizliyi ilə bu təxribatçıların və cinayət ünsürlərinin Azərbaycan Respublikası ərazisinə buraxılmasına görə məsuliyyət daşıyırlar. Sözsüz ki, bu kimi təxribatlar və insidentlər iki ölkə arasında təşəkkül tapmış dostluq, mehriban qonşuluq və strateji tərəfdaşlıq münasibətlərinə zərbə vurur. Bu cinayəti törədən şəxslər məsuliyyətə cəlb edilməli və qanunların tələbinə uyğun cəzalandırılmalıdır", - X.Xələfov deyib.

O, təəssüf hissi ilə qeyd edib ki, Gürcüstan və Azərbaycan komissiyalarının işində uzun fasilələr olub. Bu fasilələrə səbəb partnyorların tez-tez dəyişməsidir.

"Azərbaycan tərəfi komissiyaların iclaslarının davamlı və ardıcıl olması üçün səylər göstərib. Bu il mayın 23-24-də Bakıda keçirilmiş Azərbaycan Respublikası ilə Gürcüstan arasında dövlət sərhəddinin delimitasiyası və demarkasiyası üzrə növbəti 12-ci iclasda komissiyaların işçi qrupları səviyyəsində dövlət sərhəd xəttinin razılaşdırılmamış sahələrinə yerində baxış və müvafiq ölçmə işlərinin aparılması barədə razılıq əldə olunub və tərəfimizdən bu işlərin cari ilin avqust ayının ikinci yarısında həyata keçirilməsi təklif edilib. Həmin görüşün nəticələrinə əsasən komissiyaların növbəti iclasının Gürcüstanda keçirilməsi nəzərdə tutulur", - X.Xələfov bildirib. 06B-