Xəzərin hüquqi statusu üzrə İşçi Qrupun 32-ci iclasının yekunları haqqında

Rusiya XİN öz saytında Xəzər dənizinin Hüquqi statusu haqqında Konvensiyanın işlənib hazırlanması üzrə Xəzəryanı dövlətlərin xarici işlər nazirlərinin müavinləri səviyyəsində Xüsusi İşçi Qrupun aprelin 23-24-də Tehranda keçirilmiş 32-ci iclasının yekunları haqqında məlumat dərc edib. 

Məlumatda deyilir ki, iclasda Azərbaycan (nümayəndə heyətinin başçısı Xələfov), İran (Axundzadə), Qazaxıstan (Amanjolov), Rusiya (Bratçikov) və Türkmənistan (Atacanov) nümayəndə heyətləri iştirak ediblər.

İclası açan İran XİN rəhbəri Salehi Xüsusi İşçi Qrupun fəaliyyətini yüksək qiymətləndirib və dənizdə fəaliyyətin ümumi prinsiplərini, habelə sahilyanı dövlətlərin Xəzərlə bağlı hüquq və öhdəliklərini müəyyən edən Xəzərin hüquqi statusu haqqında Konvensiyanın işlənib hazırlanmasının sürətləndirilməsi zərurətini qeyd edib.

Dostluq və konstruktivlik şəraitində keçirilən iclasda nümayəndə heyəti başçıları ölkələrinin Xəzərin hüquqi statusunun əsas elementləri və dənizdə əməkdaşlığın müxtəlif aspektləri ilə bağlı mövqelərini təqdim ediblər. Tərəflər Konvensiya layihəsinin bəzi müddəaları üzrə yeni təkliflər və güzəştli ifadələr irəli sürüblər.

Üçüncü Xəzər Sammitində (Bakı, 2010) qəbul edilmiş qərarların ən qısa zamanda yerinə yetirilməsinin əhəmiyyəti xüsusi qeyd edilib.

Xüsusən, İşçi Qrupun növbəti iclasında bütün tərəflərin öz başlanğıc xətlərini çəkməklə, kartoqrafik sxemlər təqdim etməsi zərurəti haqqında qarşılıqlı anlaşma əldə olunub. 

Nümayəndə heyətləri Xəzərin hüquqi statusu haqqında Konvensiya layihəsinin razılaşdırılmasının fəallaşdırılması məqsədləri haqqında danışıqların sürətinin qorunub saxlanması zərurətini qeyd ediblər.

Xüsusi işçi qrupun növbəti 33-cü iclası Bakıda keçiriləcək. Tərəflər iclasın keçiriləcəyi tarixin bir ay ərzində diplomatik kanallarla müəyyən edilməsi haqqında razılığa gəliblər. -02D-