Xüsusi Rabitə və İnformasiya Təhlükəsizliyi Dövlət Xidməti COP29 konfransında kibertəhlükəsizliyi təmin edəcək

Xüsusi Rabitə və İnformasiya Təhlükəsizliyi Dövlət Xidməti bu ilin noyabrında Bakıda keçiriləcək Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) zamanı informasiya təhlükəsizliyinin təmin edilməsi üçün mühüm addımlar atır.

Bu beynəlxalq tədbirə hazırlıq çərçivəsində Dövlət Xidməti kompleks tədbirlər həyata keçirir. Bunlara COP29 məlumat bazasının ən müasir məlumat mərkəzində yerləşdirilməsi, hərtərəfli təhlükəsizlik yoxlamalarının aparılması, mühüm telekommunikasiya problemlərinin həlli və tədbirin keçirilmə ərazisinin AzStateNet İnternet şəbəkəsilə əhatə olunmasının təmin edilməsi daxildir.

"Biz COP29 komandası ilə daimi koordinasiyadayıq, bu mühüm təhlükəsizlik məsələlərini müzakirə və həll etmək üçün müntəzəm görüşlər keçiririk", - Xüsusi Rabitə və İnformasiya Təhlükəsizliyi Dövlət Xidmətinin rəhbəri Tural Məmmədov dövlət qurumlarının İT- xidmətləri rəhbərlərinin IV sammitində bildirib.

Dövlət Xidməti informasiya və kibertəhlükəsizliyi daha da möhkəmləndirmək üçün dövlət qurumlarında kibertəhlükəsizlik sahəsində  fəaliyyət planlarının icrasının monitorinqi və qiymətləndirilməsi üçün nəzərdə tutulmuş platforma hazırlayıb. Bu  platforma idarələrarası müzakirələri asanlaşdırır və hər bir dövlət qurumundan onların icrasına dair məlumatları real vaxt rejimində daxil etməyi tələb edir.

İnformasiya təhlükəsizliyi üzrə Koordinasiya Komissiyasının nəzdində yaradılmış monitorinq və qiymətləndirmə üzrə işçi qrupu əvvəlcədən müəyyən edilmiş göstəricilər əsasında həyata keçirilən tədbirlərin effektivliyini qiymətləndirmək üçün bu platformadan istifadə edəcək, Tural Məmmədov əlavə edib.