Y.Cəfərliyə qarşı cinayətlə bağlı hələ araşdırma gedir

“Ehtiyatda və İstefada olan Zabitlər BirlIyi”nin (EİOZB) sədri Yaşar Cəfərliyə qarşı törədilən cinayət işi Bakı hərbi prokurorluğunda araşdırma mərhələsindədir. Bu haqda Turan-a Y.Cəfərli bildirib.

Cinayət əməli törədən hərbi qulluqçu Elxan Hüseynovdan ifadə alınıb. Hadisə ilə bağlı Y.Cəfərli özü də ifadə verib. Bu günlərdə hadisə yerinə baxış keçirilməsi gözlənilir. Y.Cəfərli baş vermiş cinayətin baş prokurorluğun nəzarətində olduğu deyilib. Cinayət hadisəsini iki şəxsin törətdiyini deyən Y.Cəfərli qeyd edib ki, E.Hüseynov ifadəsində hadisəni tək törətdiyini bildirir və digər şəxsin kimliyini inkar edir. Y.Cəfərli hadisəni törədən şəxsə qarşı hansı ittiham irəli sürülməsi haqda məlumata malik olmadığını deyib.

Y.Cəfərli ümumən istintaq prosesinin gedişindəın narazılıq etməsə də? işlərin daha operativ getməsini, işin sonuna qədər obyektiv araşdırılacağı haqda yuxarı dairələrin zəmanət verməsini istədiyini söyləyib. Eyni zamanda cinayət hadisəsini törədən şəxsin hərbçi olmasına baxmayaraq, bu faktla bağlı Müdafiə Nazirliyinin hələ indiyə kimi açıqlama və ya bəyanatla çıxış etməməsinə narazılığını ifadə edib.

Y.Cəfərli bu il aprelin 2-si axşam saat 22 radələrində yaşadığı evin yaxınlığında iki şəxsin fiziki zorakılığına məruz qalıb, yaxındakı vətəndaşların köməyilə onlardan biri yaxalanıb, polisə təhvil verilib. Elxan Hüseynov adlı həmin şəxs hərbi qulluqçu olduğu üçün iş daha sonra Bakı hərbi prokurorluğuna göndərilib. -05B-