Yeni köhnə sədir

Bakı/10.03.20/Turan: Milli Məclisin yeni seçilmiş sədri filoloq,  professor,  deputat Sahibə Qafarovadır. O 2010-cu ildən millət vəkili, parlamentin Ailə, qadın və uşaq komitəsi sədrinin müavini, parlamentin beynəlxalq münasibətlər və parlamentlərarası əlaqələr komitəsinin üzvü, hakim Yeni Azərbaycan Partiyasının üzvüdür. Sahibə Qafarovanın Milli Məclisin spikeri vəzifəsinə namizədliyi Yeni Azərbaycan Partiyasının qapalı iclasında irəli sürülüb.  Milli Məclisin spikeri parlamentdə çoxluq təşkil edən partiya tərəfindən seçilir.

 Əli Hüseynli Milli Məclisin birinci vitse-spikeri, Adil Əliyev və Azay Quliyev isə vitse-spikerlər olacaqlar. Beləliklə, Milli Məclis rəhbərliyinin tərkibi dəyişəcək. Əli Hüseynli Milli Məclisin Hüquq siyasəti və dövlət quruculuğu komitəsinin sədri idi.

S.Qafarova 1955-ci ildə anadan olub. Azərbaycan Rus Dili İnstitutunda və Azərbaycan Xarici Dillər İnstitutunda təhsil alıb. 1981-ci ildən Slavyan və Qərb universitetlərində müəllim işləyir. Professor Qafarova bir neçə kitab və dərsliyin (“Gender və filologiya” və s.) müəllifidir.

S.Qafarova 2010-cu ildən Azərbaycan parlamentinin deputatıdır. Şəmkir seçki dairəsindən deputatdır. 2020-ci ildə keçirilən növbədənkənar parlament seçkilərindən sonra 98 saylı Şəmkir dairəsində seçicilər hay-küylü etiraz aksiyası keçirərək  S.Qafarovanı seçmədiklərini bildiriblər. Seçicilər Şəmkirdə seçki saxtakarlığı barədə məlumat veriblər və əslində namizəd Elfaq Səfərovun seçildiyinə israr ediblər.

https://youtu.be/SMrahlte5-M

Ötən illərdə S.Qafarova Avropa Şurası Parlament Assambleyasının iclaslarında iştirak edib, Almaniyada qadınlara qarşı zorakılığı pisləyən çıxışlar edib. Avronest iclasındakı çıxışında Ermənistanın işğalçılıq siyasətini pisləyib.

Bu yaxınlarda deputat S.Qafarova Azərbaycan KİV-ə müsahibəsində ölkədə koronavirusun yayılmasına baxmayaraq, prezident İlham Əliyevin bir sıra rayonların sakinləri ilə görüşmək qərarında olduğunu qeyd edib. “Belə bir vaxtda prezident İlham Əliyevin Şəmkir, Geranboy və Qazax rayonlarına səfəri, müxtəlif obyektlərin açılışında iştirakı və ictimaiyyət nümayəndələri ilə görüşləri göstərir ki,  təhlükəli vəziyyətin  olmasına baxmayaraq, dövlət başçısı xalqın yanındadır”, - S.Qafarova vurğulayıb. -0—