Yerevan Ankara ilə münasibətlərin normallaşdırılmasının tərəfdarıdır - Mnatsakanyan

Bakı/11.12.18/Turan: Yerevan Ankara ilə münasibətlərin normallaşdırılmasının tərəfdarıdır, bu barədə Ermənistanın xarici işlər naziri Zöhrab Mnatsakanyan Yerevanda bir qrup türk jurnalistlə görüşündə bildirib.

Onun sözlərinə görə, Nikol Paşinyanın blokunun növbədənkənar parlament seçkilərində qələbəsi Ermənistanda islahatlar üçün yol açacaq. O, Türkiyə və Ermənistan arasında münasibətlərin normallaşdırılması üzrə danışıqların tezliklə yeni təkan alacağından əminliyini ifadə edib.

"Biz Türkiyə və Ermənistan arasında münasibətlərin normallaşdırılmasının tərəfdarıyıq. Bu, davamlı proses olmalıdır. İki ölkə arasında keçmişdə xoşagəlməz hadisələr olub, amma biz əvvəlcədən şərt qoşmadan danışıqlara başlayırıq. Bu, çətin kimi görünə bilər, amma iki ölkənin münasibətlərində yeni yol çizilməlidir", deyə "Anadolu" agentliyi Mnatsakanyandan sitat gətirir.

Onun sözlərinə görə, ermənilərin türklərə qarşı qərəzli münasibəti yoxdur.

"Keçmişdə iki ölkə arasında baş verənlər təkrarlanmamalıdır", deyə Mnatsakanyan qeyd edib. Nazirin fikrincə, Türkiyə və Ermənistanın problemlərin həlli üçün kifayət qədər potensialı var. -02D-