Yerevan Naxçıvan istiqamətində də operativ əlaqə yaratmağı təklif edir

Yerevan/30.10.18/Turan: Yerevanda səfərdə olan ATƏT Minsk Qrupunun həmsədrləri bazar ertəsi Ermənistanın xarici işlər naziri Zoqrab Mnatsakanyan və müdafiə naziri David Tonoyanla görüş keçiriblər.

Arminfo agentliyinin məlumatına görə, XİN-də keçirilən görüşdə Mnatsakanyan Qarabağ nizamlanmasında formalaşmış müsbət dinamikadan məmnunluq ifadə ediblər.

Tərəflər Ermənistanın baş naziri Nikol Paşinyan və Azərbaycan prezidenti İlham Əliyev arasında Düşənbədə əldə edilmiş razılaşmalara toxunublar. Mnatsakanyan qeyd edib ki, onların praktiki tətbiqi sülh atmosferinin yaradılmasına və stimullaşdırılmasına yönəlib.

Ermənistan Müdafiə Nazirliyində MQ həmsədrləri ilə görüşdə Tonoyan Paşinyan və Əliyev arasında operativ əlaqə yaradılması haqqında razılaşmanın əhəmiyyətini qeyd edərək, həmsədrlərin Naxçıvan istiqamətində də belə operativ əlaqə yaradılmasına kömək edəcəklərinə ümid etdiyini bildirib.

Qeyd edək ki, çərşənbə axşamı həmsədrlər Dağlıq Qarabağa səfər edəcəklər, daha sonra Bakıya gələcəklər. -02D-