Yerevan Qarabağ məsələsinin sülh müqaviləsinə daxil edilməsinə razı deyil

Bakı/28.02.23/Turan: Yerevanla Bakı arasında sülh müqaviləsinə dair  məsələlər üzrə konsensus əldə olunub. Bu barədə çərşənbə axşamı Ermənistan parlamentinin spikeri Alen Simonyan jurnalistlərə bildirib.

"Mən onları səsləndirə bilmərəm, çünki bu, prosesə mane ola bilər. Ancaq deyə bilərəm ki, bunlar beynəlxalq səviyyədə qəbul edilmiş prinsiplərdir. Bunlar ümumi müddəalardır", - "Sputnik-Armeniya" Simonyandan sitat gətirir.

Simonyan qeyd edib ki, erməni tərəfi sənədin mətninə Ermənistanın dövlətçiliyini, suverenliyini və ərazi bütövlüyünü təhdid edə biləcək "bombalar”ın daxil edilməsinə qarşıdır. Onun sözlərinə görə, sülh müqaviləsində Qarabağ probleminə dair hər hansı müddəa olmamalıdır.

"Onu başa düşməliyik ki, Arsax haqqında hər hansı bir şeyin müqaviləyə daxil edilməsi bizim maraqlarımızdan, arsaxlıların maraqlarından irəli gəlirmi? Qoy, elə təəssürat yaranmasın ki, biz Arsaxın maraqlarını və onun əhalisinin hüquqlarını qorumaqdan imtina edirik", - o deyib.

Simonyan həmçinin bildirib ki, erməni tərəfinin təkliflərinə Bakının reaksiyası barədə məlumatı yoxdur.

Fevralın 16-da Ermənistan hökumətinin başçısı Nikol Paşinyan bildirib ki, Yerevan Bakı ilə sülh müqaviləsi üzərində işin növbəti mərhələsini başa çatdırıb, öz təkliflərini Azərbaycan tərəfə çatdırıb. Onun sözlərinə görə, söhbət bütöv müqavilə layihəsindən gedir. Sənəd ATƏT-in Minsk Qrupunun həmsədr ölkələrinə də verilib.

Öz növbəsində, Azərbaycan prezidenti İlham Əliyev Münhen Təhlükəsizlik Konfransında jurnalistlərə bildirib ki, Bakı və Yerevan gələcək sülh müqaviləsinin bir sıra müddəaları üzrə razılığa gəliblər. 02D