Yerevanda yeganə sinaqoq təhqir edilib

Bakı/09.10.23/Turan: Oktyabrın 3-nə keçən gecə Ermənistanın paytaxtında fəaliyyət göstərən yeganə sinaqoq - "Mordexay xa-Navi" təhqir edilib. Vandallar binaya yanan maddə ilə dolu şüşə atıblar, pəncərələri sındırıblar və binanın xarici divarlarına boya atıblar. "Kan Reşet-bet" radiostansiyasının yaydığı məlumata görə, buna "İsrailin Azərbaycanı dəstəkləməsi" səbəb olub.

Ermənistan KİV-lərinin məlumatına görə, məsuliyyəti ASALA-nın gənclər təşkilatı öz üzərinə götürüb.

"Biz, erməni xalqının azadlığı uğrunda həqiqi döyüşçülərin gənc davamçıları, qürurla 3 oktyabr 2023-cü il tarixində səhər saatlarında Yerevanda Ümumdünya Yəhudi Mərkəzinə (Nar-Dos küç., 23) qarşı həyata keçirilmiş qorxutma əməliyyatı haqqında məlumat veririk.

Yəhudilər erməni xalqının düşməni, türklərin cinayətlərinin və qanlı Əliyev rejiminin Ermənistan Respublikasına və Arsaxa (Dağlıq Qarabağ) qarşı cinayətlərinin iştirakçısı, 100 mindən çox Arsax sakininin ermənilərin ata-baba torpaqlarından zorla deportasiyasının iştirakçısıdırlar. Yəhudi dövləti cinayətkar Əliyev rejimini silahla təchiz edir, Amerika və Avropa yəhudiləri onu fəal şəkildə dəstəkləyir. ABŞ və Avropa ravvinləri Əliyev rejimini dəstəkləməyə davam edəcəksə, biz başqa ölkələrdə də sinaqoqları yandıracağıq. Hər bir ravvin bizim diqqət mərkəzimizdə olacaq".

Bir müddət əvvəl, sentyabrın 9-da naməlum şəxs bu sinaqoqa daxil olub və orada dua edən yəhudiləri təhdid edib. Bu, avqustun sonlarından sentyabrın ortalarına qədər ABŞ, Avropa və digər ölkələrdən 200-ə yaxın ravvinin ermənilərin Qarabağ hadisələrini Xolokostla eyniləşdirmək təbliğatı cəhdlərinə kəskin etirazı etməsi ilə əlaqədar olub. Buna cavab olaraq erməni diasporasının nümayəndələri ravvinlərə təzyiq göstərməyə başlamışdılar.

Ermənistan hakimiyyəti hələlik nə 9 sentyabr tarixində baş verən hadisəyə, nə bu yaxınlarda sinaqoqda törədilən vandalizm aktına rəsmi münasibət bildirməyib. 02B