Zaur Əkbər: Azərbaycandan fərqli olaraq, Belarusda siyasi məhbus yoxdur

Bakı/13.05.19/Turan: Brüsseldə Avropa İttifaqı Şərq Tərəfdaşlığı proqramının 10 illiyilə bağlı Şərq Tərəfdaşlığı ölkələrinin xarici işlər nazirlərinin toplantısı keçirlir. Toplantıda Avropa İttifaqı Xarici Siyasət və Təhlükəsizlik İdarəsinin rəhbəri Federica Mogherini, Komissar Johannes Hahn və Şərq Tərəfdaşlığı Vətəndaş Cəmiyyəti Forumu adından bu forumun idarə heyətinin üzvü Zaur Əkbər çıxış edib.

Zaur Əkbər Turan-a bildirib ki, Şərq Tərəfdaşlığı proqramına daxil olan altı ölkəni (Azərbaycan, Belarus, Gürcüstan, Ermənistan, Ukrayna və Moldova) əhatə edən çıxışında bu ölkələrdə vətəndaş cəmiyyətinin mövcud durumu və insan hüquqları məsələlərinə toxunub.

"Çıxışımın Azərbaycanla bağlı hissəsində siyasi məhbuslar, QHT qanunvericiliyinə edilən neqativ dəyişikliklər, vəkillərin müstəqil mövqeyinə görə təqiblərə məruz qalması və Vəkillər Kollegiyasından uzaqlaşdırıldığını bildirdim. Sadaladığım bütün problemlərin həllində isə ölkədə azad və ədalətli seçkilərin keçirilməli olduğunu qeyd etdim", deyə o qeyd edib.

O bildirib ki, ölkədə 51 siyasi məhbus azad edilsə də, problem tam həllini tapmayıb. "Bütün siyasi məhbuslar azad edilməlidir".

Zaur Əkbər çıxışında bildirib ki, son on ildə əsasən Ukrayna və Gürcüstanın QHT sektorunda irəliləyiş müşahidə edilib.

"Hər iki ölkə Avropa Birliyi və Avropa Komissiyası ilə bir sıra proqramlar həyata keçirib. Erasmus proqramı nəticəsində bu ölkələrdən çoxsaylı gənc Avropa universitetlərində təhsil alıb. Bu ölkələrdə yerli vətəndaş cəmiyyəti institutları səfərbər ola bilib. Moldovada da problemlər qalır. Amma o ölkədə də tədrici inkişaf var. Ermənistanda məxməri inqilabdan sonra vətəndaş cəmiyyəti ilə bağlı yenidən formalaşma olduğunu bildirdim. Orada da problemlər qalır. Bearusda vətəndaş cəmiyyəti ilə bağlı problemlər qalır. Amma bu ölkənin insan hüquqları ilə bağlı Avropa İttifaqı ilə dialoqa başlamasını müsbət qiymətləndirdim. Tezlikldə Belarusla Avropa İttifaqı ölkələri arasında viza liberallaşmasının tətbiq olunacağının bu və digər problemlərin həllinə kömək edəcəyini dedim".

Zaur Əkbər Şərq Tərəfdaşlığı proqramına daxil olan ölkələrdə Azərbaycandakı durumu müqayisə edərkən deyib ki, Azərbaycanda digər üzv dövlətlərlə müqayisədə vəziyyət ürəkaçan deyil.

"Həm QHT qanunvericiliyi, həm siyasi məhbusların olması, həm toplaşmaq azadlığı, həm azad mətbuat baxımından ölkədə durum yaxşı deyil. Bəzi şəxslərin ölkədən çıxışına qadağalar son zamanlar götürülsə də, problemin bütövlükdə həlli qalmaqdadır. Ümumilikdə ölkədə vətəndaş cəmiyyətinin azad fəaliyyətinin hələ də məhdud olması əsas problemlərdən biridir".

O, Azərbaycan və Belarusda ümumi durumu müqayisə edərkən deyib ki, "təəssüf ki, Belarusda siyasi məhbus yoxdur, Azərbaycanda isə təxminən 70 siyasi məhbus qalmaqdadır", deyə Zaur Əkbər qeyd edib. -03B-

Rəy yaz

Siyasət

İran Prezidentinin də həlak olduğu helikopter qəzasına görə məsuliyyəti kim daşıyır? – Sədrəddin Soltan Çətin sualda



Bizi sosial şəbəkələrdə izləyin

Xəbər lenti