Zelenski Polşa, Latviya, Litva və Estoniya prezidentlərilə görüşünün nəticələrini şərh edib

Kiyev/14.04.22/Turan: Ukrayna Prezidenti Vladimir Zelenski Polşa, Latviya, Litva və Estoniya prezidentləri ilə danışıqların səmərəli olduğunu bildirib.

"Danışıqlar səmərəli oldu. Prezidentlərin Kiyev vilayətində Borodyankaya gəlməsi, işğalçıların nələr törətdiklərini öz gözləri ilə görməsi vacib idi", - prezident qeyd edib.

Zelenskinin sözlərinə görə, bu, onun həmkarları üçün həm də Rusiyaya qarşı real hiss olunan sanksiyalara sərt israr etmək üçün daha bir arqument oldu.

"Hər şeydən əvvəl neft embarqosu və Avropanın Rusiyanın bütün enerji daşıyıcılarından imtina etməyə hazır olması lazımdır. Avropa İttifaqı Rusiya hərb maşınına sponsorluğu dayandırmalıdır", - dövlət başçısı bir daha vurğulayıb.

O xatırladıb ki, artıq üç həftədir ki, Ukrayna və beynəlxalq ekspertlər qrupu işləyir, onlar Rusiyaya qarşı tətbiq edilən sanksiyaların real təsirini təhlil edir və onların gücləndirilməsi üçün təkliflər verirlər.

Ekspertlər Rusiyanın sanksiyalardan yan keçmək üçün istifadə etdiyi boşluqları aradan qaldırmağa kömək edəcək və sanksiyaları Moskva üçün təsirli edəcək konkret təkliflər hazırlayıblar.

Duda qeyd edib ki, Kiyev vilayətinin işğaldan azad edilmiş yaşayış məntəqələrinə səfəri zamanı bu müharibənin iki üzünü görüb. Birincisi, müharibənin bütün  qaydalarına və prinsiplərinə riayət edərək rus işğalçılarına qarşı vuruşan Ukrayna hərbçiləridir.

"Və bu müharibənin ikinci üzünü gördük ki, bunun anlaşılması çətindir... Bu, bombardman edilmiş yaşayış massivləri, məhv edilmiş yaşayış binalarıdır. Hərbi obyektlər yox, sadə insanların yaşadığı adi evlər... Mən bu xarabalıqları televiziyada görmüşdüm,  indi də onları real həyatda gördüm. Buna inanmaq çətindir. Ona görə də mən cənab prezident Zelenskiyə dedim ki, bu, müharibə deyil, terrordur... bu, qəddarlıq və quldurluqdur...”,- o deyib.

Polşa prezidenti qeyd edib ki, müharibənin bu ikinci üzü ilə heç vaxt razılaşmayacaq.

"Bəşəriyyət yaranandan müharibələr var, lakin 21 əsrdə qadın və uşaqların öldürülməsi, yaşayış evlərinin, çoxmərtəbəli binaların bombalanması terrorizmdir, banditizmdir.. Bu, beynəlxalq hüquq prinsiplərinin tapdalanmasıdır... Bu prinsiplərə belə yanaşanlara bu gün beynəlxalq birlik arasında yer yoxdur", - Duda hesab edir.

Deməli, onun fikrincə, Rusiya beynəlxalq birliklərdən xaric edilməlidir.

"Rusiya qəbul edilə bilməz... Bu prinsipləri tapdalayanlarla dialoq aparmaq olmaz. Rusiya etiraf etməlidir... o hücum etdi... və bu cinayətlərin icraçıları və onlara icazə və əmr verənlər görə məsuliyyət daşımalıdırlar...Onların hamısı beynəlxalq məhkəmələrdə cəzalandırılmalıdır... Belə şeyləri törədənlər cəzalandırılmalıdır, cəza bitənə qədərsə bir müddət  aradan qaldırılmalıdır...", - Polşa lideri qeyd edib.

UNİAN bildirib ki, Estoniya, Latviya, Litva və Polşa prezidentləri həmrəylik əlaməti olaraq aprelin 13-də dəmir yolu ilə Kiyevə gəliblər.