Azərbaycana qarşı "Suriya muzdluları" movzunu gündəmə gətirirlər

Erməni yançısı olan Rusiya mətbuatı, Britaniyanın nüfuzlu BBC radiosunun rus redaksiyası və Qərbin bir sıra mətbuat orqanları indi də Azərbaycana qarşı "Suriya muzdluları" movzunu gündəmə gətirirlər. BBC-nin rus redaksiyası bu məsələ ilə bağlı geniş məqalə verir, amma yazının girişində qeyd edir ki, bunu təsdiq edəcək bir başa dəlilimiz yoxdur. Qəribə yanaşmadır. Bir başa dəlilin yoxdursa necə bunu dünyaya car çəkirsən? Burada əsas məqsədlərdən biri Azərbaycanın işğal altında olan ərazilərini azad etməsinə dini məzmun vermək, məsələni xristian-müsəlman müharibəsi müstəvisinə çəkməkdir. Bugün az qala dünyanın yarısında muzdlu saxlayan Rusiya da bu məsələdən proseslərə müdaxilə imkanı kimi yararlanmaq istəyir. Lap bu yaxınlarda Suriya əməliyyatında Amerikalılar çoxlu sayda rus hərbçisini zərərsizləşdirəndə Rusiya açıq bəyanat verdi ki, onlar rus vətəndaşları olsa da, müqavilə əsasında fərdi qaydada Suriyada döyüşən keçmiş hərbçilərdir, Rusiyanın rəsmi ordusunun xidmətçiləri deyillər.

Əslində Qarabağ savaşının tarixinə nəzər salsaq Azərbaycan ərazilərinin işğalında Ermənistan tərəfi xarici muzdluların xidmətlərindən geniş istifadə edib və bunu təsdiq edən çoxlu faktlar var. Məsəlnin maraqlı olan digər bir tərəfi ondan ibarətdir ki, vaxtiyla Dağlıq Qarabağın və ətraf 7 rayonun işğal edilməsində Livandan, Suriyadan və əsasən Rusiyadan olan muzdlular birbaşa iştirak ediblər. Hətta İran hezbollah muzdlularının Ermənistan tərəfindən əməliyyatlarda iştirakına dair bəzi faktlar da üzə çıxdı. Yəni, Ermənistan Qarabağın işğalında hansı metodlardan, hansı muzdlu hərbi xidmətdən necə istifadə etmişdisə, indi Azərbaycanı həmin "əməllərdə" ittiham edir.

Əlbəttə, kimin istifadə etməsindən asılı olmayaraq, biz bunu təqdir etmirik. Muzdlunun haradan olması mühim deyil. Muzdlu muzdludur, pulla döyüşəndir. Əgər xatırlayırsınısa Azərbaycan ərazilərinin işğalında birbaşa iştirak edən, daha çox dağıdıcı diversiya əməliyyatları həyata keçirən Rusiya muzdlularının bir neçəsi (5 və ya 7 nəfər) döyüş əməliyyatı meydanında tərksilah edilmişdilər. Onlar həmin dövrdə Rusiya prezidenti Boris Yeltsinin Heydər Əliyevə təkidli xahişlərindən sonra azad edilmişdilər. Rus muzdlularının Qarabağın işğal əməliyyatında iştirakına dair yüzlərlə faktlar vardır. Hətta o zaman Rusiya XİN-i etiraf etmişdi ki, istefada olan ayrı-ayrı Rusiya hərbçilərinin Ermənistan ordusunda muzdlu kimi xidmət etməsi Moskvanın rəsmi siyasəti deyil, fərdi xarakter daşıyır. Ermənistan tərəfindən vuruşan muzdlular həlak olandan sonra neçəsinin çibindən daha çox ərəb ölkələrinə məxsus xarici pasport və kimlik sənədləri çıxmışdı. Belə faktlar yetərincədir.

Muzdlu təbliğatında məqsəd nədir? Məqsəd Azərbaycan ordusunun öz ərazilərini 27 illik işğaldan azad etmək əməliyyatına, Ermənistanın işğalçı qoşunlarının işğal edilmiş ərazilərdən çıxarmaq uğrunda savaşına, öz vətəninin xarici qoşunlardan təmizləmək missiyasına kölgə salmaq, məsələyə dini qarşıdurma, dini müharibə xarakteri verməkdir. Problemin həlli "muzdlu təbliğatından" deyil, işğalçı Ermənistan qoşunlarının Azərbaycan torpaqlarını tərk etməsindən keçir. 30 illik bir fakt ortadadır.