Azsaylı uğurlar, çoxsaylı uğursuzluqlar: dövlət nəşrlərə reaksiya vermək istəmir

Az qaldı, 2017-ci il başa çatır. Contact.az-da mühüm daxili siyasi və sosial problemləri əks etdirən aktual nəşrlərə yekun vurmağın vaxtı çatıb. Bütün məqalələrimizin nəticələrini gözdən keçirmək mümkün deyil, onların sayı həddindən artıq çoxdur. Amma jurnalistlərimizin nəşrlərinin bəzi nəticələri yadda qalıb. Şübhəsiz, qaldırdığımız problemlərin müsbət nəticələnməsində hüquq müdafiə təşkilatlarının, vəkillərin və digər KİV-lərdən həmkarlarımızın çox böyük, bəzən hətta həlledici rolu olub.

İlk növbədə məmnuniyyətlə Turan agentliyinin hakimiyyətlə avqustda direktor Mehman Əliyevin həbsi ilə başlayan beş aylıq çətin mübarizəsinin müsbət yekunlaşmasını qeyd etmək lazımdır. Contact.az M.Əliyevin azad edilməsini və Vergilər Nazirliyinin absurd ittihamlarının ləğvini tələb edən ilk və ən ardıcıl KİV-lər arasında idi. Direktor sentyabrda azadlığa çıxdı, Vergilər Nazirliyi isə son ana qədər agentliyin borcunun olmadığını sənədli şəkildə etiraf etməkdən imtina edirdi. Vergi işçilərinin yerinə bunu dekabrın 19-da Vergilər Nazirliyinin agentliyin 38 min borcu olması haqqında qərarını ləğv edən Bakı şəhər İnzibati-İqtisad Məhkəməsi etdi.

Eyni zamanda, contact.az-ın qanunsuz olaraq həbsdə saxlanılmasının yolverilməz olduğunu bəyan etdiyi siyasi məhbus İlqar Məmmədov, habelə Azərbaycandakı onlarla digər siyasi məhbus hələ də azadlığa çıxmayıb. Dekabrın 31-də Azərbaycanlıların Həmrəylik Günündə adətən amnistiya həyata keçirilir. Bəlkə də, İ.Məmmədovu tezliklə azad edəcəklər, belə ki, Avropa Məhkəməsi Aİ-nin İ.Məmmədovun azad edilməsi üzrə qərarının yerinə yetirilməməsində Azərbaycanın təqsirini araşdırmağa başlayıb. İlin sonunda onu və digər siyasi məhbusları azadlığa buraxsalar, bu, 2017-ci ilin ən sevindirici xəbəri olacaq.

Sosial sahədən: Oktyabrın 13-də evsiz bakılı Danilovun ağır taleyinin nümunə kimi göstərildiyi "Azərbaycanda dövlətin yetkinlik yaşına çatmış evsiz vətəndaşlara kömək sistemi yoxdur" sərlövhəli məqalə dərc etdik. Nəşrimizdən sonra Danilov Zabrat yeni, noyabrda istismara verilmiş evsizlər üçün sığınacağa yerləşdirilib. Bu nəşrin təşəbbüskarı Natalya İorina contact.az-a dövlətin evsizlər üçün yaratdığı gözəl şəraitdən danışıb. Sığınacaqda üzgüçülük hovuzu belə var, qurumun işçiləri isə evsiz şəxslərin itirilmiş sənədlərini bərpa edirlər. Amma dekabrın əvvəllərində biz İorinadan qəyyumluğu altında olan şəxsin əvvəlki küçə həyatına qayıtmaq üçün tərtəmiz yataqları, gündə üç dəfə pulsuz yeməyi olan sığınacağı könüllü olaraq tərk etdiyi haqqında məlumat aldıq. Natalya çox kədərlənmişdi, indi onun qəyyumluğu altında olan başqa bir şəxs var - yenə evsiz.

Təəssüf ki, şəxsi evlərin-bağların tikintisi zamanı rüşvətxorluqla mübarizədə irəliləyiş yoxdur. Aprelin 29-da dərc etdiyimiz "Məlumatlandırma inşaatı şəraitində rüşvətxorluq metodologiyası" sərlövhəli məqalədə kiçik evlərin inşaatına "məlumatlandırma qaydasında icazə verilməsi" zamanı rüşvətxorluq mexanizmini ortaya çıxardıq. Mənbəmiz - Vüqar Mustafayev Bakının Sabunçu rayonunda ondan necə pul qopardıqları barədə danışıb. Həmin nəşrdə başqa faktlar, o cümlədən Abşeron rayonunda icazələrin verilməsi təcrübəsi haqqında da danışlırdı. Amma məqalə kömək etmədi, oxucuların bildirdiyinə görə, bu sahədə rüşvətxorluq davam edir.

V.Mustafayev həmçinin Bakıda və şəhərətrafı qəsəbələrdə qaçaq siqaretlərin qanunsuz satışı faktlarından da danışıb. Noyabrın 21-də biz "Qaçaq siqaretlərin satışı artır" sərlövhəli məqalədə bu cür sövdələşmələrin həyata keçirildiyi avtomobillərin fotoşəkillərini dərc etmişdik. Dekabrda bu məqalənin müəllifi salonundan qaçaqmal satan "Jiquli"ni görübsə, etiraf etməliyik ki, siqaret mafiyası həqiqətən ölümsüzdür. Tütün köşkü olan maşın şəhərin mərkəzində, "Torqovaya"ya paralel küçədə dayanmışdı.

Redaksiya bizim "Bayılda özlərini hakimiyyət işçiləri kimi qələmə verən dağıdıcılar ortaya çıxıb?" (15 noyabr) sərlövhəli məqaləmizdən sonra evləri tələsik sökülmək istənilən Mixaylovlar ailəsinin öz daşınmaz əmlakını özəlləşdirməyə və evini ekskavatordan qorumağa müvəffəq olduğu haqqında xəbəri məmnunluqla qarşıladı. "Doğru, dürüst məqaləniz üçün sizə səmimi minnətdarlığımı bildirirəm. Bizə həm mənəvi, həm fiziki cəhətdən böyük dəstək verdiniz. Sizə zəng etdiyim zaman tamamilə ruhdan düşmüşdüm və özümü itirmişdim. Məqalənizi oxudum, yeni enerji qazandım və indi mübarizə aparacağam. Mixaylovlar adından təşəkkürlər!", deyə bu ailənin kürəkəni redaksiyaya yazıb.

Məlum olub ki, ötən il dövlət əsasən yerli jurnalistlərin qaldırdığı mühüm problemlərə məhəl qoymamağa davam edib. Bu, xüsusən, siyasi məhbuslar probleminə və rayon icra hakimiyyəti orqanlarında məmurların işinə aiddir.