Mixail Saakaşvili Vladimir Putinin Kremldən gedişini proqnozlaşdırıb

Gürcüstan prezidenti Mixail Saakaşvili çərşənbə günü BMT-də Baş Assambleyasında çıxış edib. Onun çıxışının böyük hissəsi Rusiyanın regionda rolu, bu ölkənin Gürcüstan da daxil olmaqla, keçmiş SSRİ respublikalarına təsirinə həsr olunub.  

VOA-nın məlumatına görə, prezident Saakaşvili “keçmiş DTK agenti Putinin tezliklə Kremldən gedəcəyini, “Rusiya imperiyası”nın sonunu, “Avrasiya İttifaqı” adlı layihənin baş tutmayacağını proqnozlaşdırıb, Gürcüstan torpaqlarının Rusiya tərəfindən anneksiyasının davam etməsini pisləyib, Gürcüstanın çərkəzlərin soyqırımını tanımasının səbəblərini açıqlayıb, onun idarəçiliyi dövründə ölkənin nailiyyətlərini sadalayıb, həyatlarını daha da yaxşılaşdıra bilmədiyi ölkə vətəndaşlarından üzrxahlıq edib. Onun çıxışı çox emosional olub. Belə ki, çıxışın ortasında Rusiya nümayəndə heyəti etiraz olaraq BMT Baş Assambleyasının iclas zalını tərk edib.

“Bir neçə ildən sonra Vladimir Putin Kremli tərk edəcək, Rusiya siyasətindən yox olacaq”,  - Saakaşvili deyib. “Rusiya vətəndaşları onu korrupsiya və repressiya dövrünün kabusu kimi xatırlayacaqlar.  Heç kim bilmir ki, bu proses dinc yoxsa güc yolu ilə olacaq. Ondan sonra liberallar və ya millətçilər gələcək. Lakin mühüm olan odur ki, Rusiyanın imperiya olmasına son qoyulacaq və o, normal dövlətə çevriləcək”.

Saakaşvili bildirib ki, Rusiya Gürcüstan ərazilərinin anneksiyasını davam etdirir və bununla da ölkəni zəiflədir. O deyib ki, BMT-də görüş zamanl Vladimir Yanukoviç ona şikayət edib ki, Rusiya onlara da təzyiq göstərir. Saakaşvili deyib ki, keçmiş sovet respublikaları arasında güclü dövlətlər – Ukrayna, Moldova, Ermənistan və Azərbaycan Rusiyaya sərf etmir.

“Siz düşünürsünüz ki, Putin Ermənistanın Azərbaycanla münaqişədə üstün tərəf olmasını istəyir? Xeyr. Bu,  Ermənistanı çox güclü və çox  müstəqil edərdi. Yoxsa, düşünürsünüz ki, Moskva istəyir ki, Bakı Yerevanı üstələsin”, - deyə Saakaşvili Dağlıq Qarabağ münaqişəsinə işarə edib.  Xeyr, onlar istəmirlər ki, kimsə qalib olsun. Onların məqsədi məhz münaqişədir. Çünki bu, millətlərin müstəqil olmasına əngəl törədir, onların Avropa İttifaqına inteqrasiyasının qarşısını alır.

Saakaşvili bildirib ki, “Avrasiya İttifaqı  ideyası Putin tərəfindən Avropa İttifaqına alternativ kimi irəli sürülüb və onun yeni prezidentlik müddətinin əsas layihəsidir”.

  “Avrasiya İttifaqı Avropa İttifaqının təsis prinsiplərinə zidd prinsiplərə əsaslanır. Onun başında keçmiş DTK agentləri durur. Məqsəd köhnə imperiyanı dirçəltməkdir. Avrasiya İttifaqına qoşulmaq sadədir – heç bir sosial, siyasi və iqtisadi meyarları yoxdur. Müstəmləkə olmaq çox asandır. Yeganə tələb passivlik və bacarıqsızlıqdır.  

Saakaşvili xəbərdarlıq edib ki, Gürcüstanda və digər keçmiş SSRİ respublikalarında “Rusiyanın ruporları” fəaliyyət göstərirlər və onlar Avropa İttifaqını və onun dəyərlərini ləkələməyə çalışırlar.

Regionun qarşıdurma mərkəzi olaraq qaldığı bir vaxtda keçmiş istila olunmuş millətlər öz güclərinin hesabına birləşməlidir, öz zəifliklərini göstərməməlidirlər. “"Birlik Şərqi Avropada, o cümlədən Qafqazda bizim qaydamız olmalıdır”, - Saakaşvili qeyd edib. 

Sonra o, hakimiyyətdə olduğu müddətdə Gürcüstanın iqtisadi sahədə, korrupsiyaya və cinayətkarlığa qarşı mübarizədə nailiyyətlərini qeyd edib.

Bu, Saakaşvilinin Baş Assamblya qarşısında vida nitqi olub. Belə ki, onun dövlət başçısı postuna ikinci və sonuncu müddəti bitir. 

Saakaşvilinin çıxışından sonra BMT yanında Rusiya nümayəndə heyəti aşağıdakı məzmunda bəyanat yayıb: 2008-ci ildə Cənubi Osetiyada törətdiyi uğursuz qanlı macəradan sonra Saakaşvilinin  BMT Baş Assambleyasında çıxışları həmişə Rusiyanın əleyhinə kobud hücumlarla  fərqlənib. Bu dəfə isə heç çıxış belə olmayıb. Bu, nəinki Rusiya əleyhinə, həm də rusofobiya, antipravoslav xarakter daşıyan cəfəng söz  yığnağıdır. Yaxşı ki, gürcü xalqı bu adamın siyasi karyerasının sona çatdığını görəcək, onun psixi durumu peşəkarcasına qiymətləndirilməlidir”.

Saakaşvilinin çıxışı zamanı  Rusiya nümayəndə heyəti zalı tərk edib.  Rusiya XİN nümayəndəsi Aleksandr Lukaşeviçin sözlərinə görə, bu, “cənab Saakaşvilinin Baş Assambleyanın tribunasından söylədiyi fikirlərə etiraz olaraq edilib”.-0—