Sadələşdirilmiş korrupsiyaya uğramış inşaat - 3

Şəxsi mənzil tikintisi sahəsində korrupsiya mövzusunun dörd aydan çoxdur davam edən araşdırması göstərir ki, qanunçuluğun geniş şəkildə pozulmasının arxasında yüksək vəzifəli himayəçilər durur.

Hakimiyyətin, demək olar ki, bütün qolları – Prezident Administrasiyası, Nazirlər Kabineti, Baş Prokurorluq, Bakı şəhər İcra Hakimiyyəti qanunvericiliyin və normativ aktların özbaşına təfsiri və istifadəsi faktlarını qəbul etməkdən imtina edir.

Baş nazir Artur Rasizadəyə və baş prokuror Zakir Qaralova qanun pozuntuları haqqında sonuncu müraciətlər fərdi inşaat üzərində nəzarəti əlində cəmləşdirmiş və bununla da bütün qanunsuz əməllərə görə məsuliyyəti öz üzərinə götürmüş Bakı şəhər icra başçısı Hacıbala Abutalıbovun güclü himayəçisi olduğunu bir daha təsdiq edir.

https://turan.az/ext/news/2016/2/free/Want_to_Say/az/51943.htm/007

Nazirlər Kabineti, demək olar ki, heç bir informasiya sorğusuna və ya məktuba cavab vermir və hər dəfə bu sorğuları digər daha aşağı hakimiyyət qollarına yönləndirir, bununla da Nazirlər Kabinetinin xəbərdarlıq xarakterli inşaatdan sui-istifadələr, habelə qanunsuz torpaq ayrılması sahəsində yerli icra hakimiyyəti orqanlarının əməlləri ilə maraqlanmadığını göstərir.

Nazirlər Kabineti növbəti dəfə özünü kənara çəkdi və məktubu cavablandırılması üçün Pirallahı rayon icra hakimiyyətinə, Fövqəladə Halalr Nazirliyinə, Dövlət Şəhərsalma və Arxitektura Komitəsinə yönləndirdi.

Pirallahı icra hakimiyyəti başçısının müavini Vəzir Səfixanov 4 mart tarixli cavab məktubunda qeyd edib ki, Azərbaycan Prezident Administrasiyası artıq yanvarın 6-da Turan-a xəbərdarlıq xarakterli inşaatla bağlı qanunvericiliyin təkmilləşdirilməsi üzrə bütün təkliflərin gələcəkdə nəzərə alınacağı barədə məlumatlandırıb. Lakin Səfixanov Nazirlər Kabinetinin müstəsna hüququ olduğu halda, Bakı şəhər icra başçısı Abutalıbov tərəfindən Pirallahı rayonuna evlərin tikintisi üçün qanunsuz olaraq 750 ha torpaq ayrılması haqqında cavabdan yayınıb.

FHN-in sənədlər və vətəndaşların müraciətləri üzrə şöbə müdiri Mehriban Səadətxan fevralın 26-da Turan agentliyinə yazılı olaraq bildirib ki, Nazirlər Kabinetinin 21 fevral 2014-cü ildə təsdiq etdiyi “Ərazilərin zonalaşdırılması, tikintinin növü və miqyası ilə bağlı müfəssəl Qaydalar” qüvvədədir və Qaydaların 4.13-cü bəndinin Qanunda əksini tapması məqsədə uyğun deyil. Normativ-hüquqi aktların uyğunlaşdırılması isə AR Konstitusiyasına və “Normativ hüquqi aktlar haqqında” Qanuna uyğun şəkildə həyata keçirilir.

Baş prokurorun xüsusi tapşırıqlar üzrə köməkçisi Sahib İsmayılovun şəxsində Baş Prokurorluq da “Korrupsiya basqısı altında fərdi inşaat” məqaləsində təqdim edilmiş qanun pozuntularını görməzdən gəlib.

https://turan.az/ext/news/2015/12/free/Social/az/35768.htm/002

İsmayılov 9 mart tarixli cavab məktubunda qeyd edib ki, agentlik icra hakimiyyətinin vəzifəli şəxsləri tərəfindən yol verilmiş cinayətlərlə bağlı heç bir fakt və dəlil təqdim etməyib. Görünür, o, Bakı və Bakı ətrafında tikilməkdə olan evlərə baxış zamanı asanlıqla görülə biləcək fərdi inşaatda kütləvi pozuntular haqqında fotoşəkilləri yetərsiz hesab edib.

Lakin Turan Agentliyinin direktoru Mehman Əliyev prokurorluğun cavab məktubundakı mövqeyi ilə razı olmadığını bildirib və İsmayılovun diqətini inşaatda sadələşdirilmiş xəbərdarlıq sistemi haqqında jurnalist məqalələrinə çəkib. Bu məqalələrdə qanunvericiliyin geniş miqyasda pozulması faktları təqdim edilib.

Amma yenə də yüksək qurumlarla 5 aydır davam edən yazışma bəhrəsini verir və tədricən yeni mühüm faktlar və müxtəlif idarələrin xəbərdarlıq xarakterli inşaat məsələsində şəxsi maraqlarını üzə çıxarır. Dövlət Şəhərsalma və Arxitektura Komitəsinin sədr müavini Dövlətxan Dövlətxanov maraqlı qeydlər edib. O, 24 fevral tarixli məktubunda bildirib ki, “Ərazilərin zonalaşdırılması, tikintinin növü və miqyası ilə bağlı müfəssəl Qaydalar” tikinti üçün ayrılmış torpaq sahələrinin zonal layihələşdirilməsi, o cümlədən baş planı üçün tətbiq olunan normativ sənəddir, amma ayrı-ayrı fərdi tikintilər üçün deyil. Yəni onun şərhindən belə çıxır ki, Bakı şəhər İcra Hakimiyyəti şəxsi ev tikintisi üçün vətədaşların müraciətlərinə baxarkən Nazirlər Kabinetinin sözügedən Qaydalarından istifadə etməməlidir. Dövlətxanov həmçinin bildirib ki, qanunvericiliyə əsasən, tikintiyə nəzarət funksiyası Fövqəladə Hallar Nazirliyinin Tikintidə Təhlükəsizlik üzrə Dövlət Agentliyinin səlahiyyətlərinə aiddir. O, həmçinin bu cavab məktubun surətini Bakı şəhər İcra Hakimiyyətinə göndərib. DŞAK sədr müavininin dediklərini nəzərə alaraq, görüntünü aydınlaşdırmaq üçün Turan agentliyi FH naziri Kəmaləddin Heydərova informasiya sorğusu göndərib.

Xatırladaq ki, icazə tələb etməyən fərdi inşaatla bağlı jurnalist araşdırma-məqalələri belə bir nəticəyə gəlir ki, Şəhərsalma Məcəlləsinin aradakı məsafə haqqında 69.4-cü maddəsindən və Nazirlər Kabinetinin “Ərazilərin zonalaşdırılması, tikintinin növü və miqyası ilə bağlı müfəssəl Qaydalar”ının bir mərtəbənin sahəsinin torpaq sahəsinin ərazisinin 20%-dən artıq olmasının yolverilməz olduğu haqqında 4.13-cü bəndindən məmurlar rüşvət almaq üçün istifadə edir. Praktiki olaraq, norma və qanunun hər iki tələbinə heç yerdə və geniş miqyasda riayət olunmur ki, bu da infrastruktura, ətraf mühitə, vətəndaşların təhlükəsizliyinə ciddi zərbə vurur, həmçinin korrupsiya mənbəyidir. -0-