“Səməd Seyidovun pafosu”

Səməd Seyidovda da pafos var e. Adam Avropa Şurasını İslamofobiyada, siyasi korrupsiya, ayrı-seçkilik, etnik və dini nifrət, ikili standartlarda ittiham edir. Azərbaycanda 200-dən artıq islam inanclı vətəndaşı, din xatimi, islam üləmasını narkotika ittihamı ilə tut bas həbsxanaya, sonra da Avropanı islamafobiyada ittiham elə. Avropada islam ölkələrindən olan mühacirlərin, qaçqınların sayı toplam olaraq Azərbaycan əhalisinin sayından çoxdur. Hər biri də Azərbaycanın Universitetlərində professorlara verilən aylıq əmək haqqından 2-3 dəfə aylıq sosial yardım alır.

Siyasi korrupsiya məsələsi ümumiyyətlə gülməlidir. AŞPA-da bu işin əsasın məhz Azərbaycan hakimiyyəti qoyub. Avropa Parlamentində deputatları "Kürü diplomatiyası" metodları ilə satın alan kimlər idi? Neçə AŞPA deputatının adı bu siyahıdan çıxdı. "Azərbaycan çamaşırxanası"ndan hansı natəmiz yollarla oğurluq pulların bir hissəsi siyasi korrupsiyaya yönəldilmişdi. İlham Əliyev Qubad İbadoğlu kimi dünyaca tanınmış alimi saxta pul kəsmək, Tofiq Yaqublu kimi ölkənin ən dürüst insanını dələduzluq, Abzas Medianın 6 əməkdaşını qaçaqmalçılıq, Harvardın məzunu Bəxtiyar Hacıyevi xuliqanlıq və məhkəməyə hörmətsizlik, 10 nəfərə qədər Cəbhə üzvünü müxtəlif saxta əmllərlə, iş adamı Nazim Bəydəmirlini qurama əməllərdə, jurnalist Əziz Orucuvu sənədsiz tikili, Rza Səfərsoyu qanunsuz silah saxlamaq, 200-dən artıq islam inanclı vətəndaşı narkotika və digər gülünc ittihamlarla tut bas dama, Avropa paytaxtlarını korrupsiya pulları ilə məhəllə-məhəllə al və sonra da bəyanat ver ki, Avropa irqçidir, islamafobdur, korrupsinoerdir.

AŞPA Azərbaycan nümayəndə heyətini 1 il müddətinə mandatdan məhrum edib. Buna əsas kimi ölkədə insan haqlarının pozulması, siyasi məhbusların sayının artması, seçkilərin saxtalaşdırılması və Azərbaycanın AŞPA-nın qarşısındakı öhdəlikləri yerinə yetirməməsi göstərilib. Həmçinin bildirildi ki, Azərbaycan təşkilatı növbədənkənar prezident seçkilərinə müşahidəçi kimi dəvət etməyib. Axı, bir vaxtlar AŞPA-dan bir təyyarə müşahidəçi gətirilirdi. İndi nə baş verir ki, Azərbaycan hakimiyyəti "köhnə dostların" yaddan çıxarır. Məhz AŞPA-nın siyasi korrupsiya yolu ilə əldə edilmiş arayışına istinad edərək İlham Əliyev mötəbər tribunalarda elan edirdi ki, Azərbaycanda siyasi məhbus yoxdur.

Nəhayət AŞPA gec də olsa bu fikrə gəldi ki, Azərbaycanda seçki deyilən bir şey yoxdur. Qarşıdakı 7 fevral prezident seçkisi də alternativsiz, təknamizədli prezident seçkisidir.