Söyüdlüdən 37-ci ilin havası gəlir

Söyüdlüdən 37-ci ilin havası gəlir. Adamları evindən, həyətindən, kəndindən oğurlayırlar. Körpə uşağı üçün dərman almağa gedən Söhrət Əsgərovdan 4 gündür xəbər yoxdur. Uşaq qalıb dərmansız. Şöhrətin yeri məlum deyil. Nə Gədəbəydə gördüm deyən var, nə də Bakıda. Yerli polis Bakıya şikayətə gələn sakinləri təhdid edir. Şöhrətin həyat yoldaşı video müraciətində deyir: "Yoldaşım uşağa dərman almaq üçün rayona gedib, polislər orada onu tutub saxlayıblar. Xəbər vermirlər. Gədəbəyin polis rəisi Mehman müəllimin yanına getmişəm, deyir, Bakıya göndərmişik. Deyirəm, Bakıda hara göndərmisən, yerini de, ora gedəcəm. Deyir ki, deyə bilmərəm, o ixtiyar bizdə yoxdur. Bəs yaxşı sən tutmusan, sən aparmısan, mən bilməli deyiləm ki, yoldaşım haradadır?!"

Əhalinin dərdini dinləyib vəziyyətini yaxşılaşdırmaq əvəzinə tuta-tut başlayıb. 200 manat pensiya alan yaşlı kişi 1500 manat cərimə edilib. İyunun 21-də yaradılan komissiyanın başçısı Muxtar nazir açıqlama verib ki, Söyüdlüdə havanı ölçüblər, qorxulu bir amillər yoxdur. Əgər Söyüdlüdə "qorxulu amil" yoxsa camaatın başına hava gəlib haray salsın? Müsahibə verənlər deyir ki, biz qırılırıq, bir ayda 20 nəfər adam ölüb, iki ayda 15 gəlin həyatdan gedib. Söyüdlüdə insanların harayı ürəklər parçalayır.

Xarici diplomatlarla bağlı qapılar arxasında hökumət bəzi şeyləri etiraf etsə də (məsələn, polis aşırı güc tətbiq edib, ətraf mühitin çirklənməsi problemi var, "Anglo Asian" şirkəti ətraf mühit və kənd camaatı ilə bağlı sosial proqramları yerinə yetirməyib və s.), lakin məsələni Culfa yoluna salırlar. Məsələn deyirlər ki, "Anglo Asian" yarı ingilis, yarı Amerika şirkətidir və bu təxribatı törədən qüvvələr guya bizim Britaniya və ABŞ-la münasibətlərimizi pozmaq istəyib. Söyüdlüdə xarici güclərə söykənən təxribat izi axtarırlar. Vallah "Molla Nəsrəddin"likdir bunların işi.

Baş nazirin başdan ayağa vəzifəli şəxslərdən ibarə komissiyasının nəticəsi əvvəlcədən bəlli idi. Muxtar nazir də Orxan başçı kimi danışdı: Sianid turşusu zərərli deyil. Bu qənatə gəlmək tezdir. Gərək komissiya üzvləri sianid gölün ətrafında bir-iki ay çadır qurub monitorinq aparsınlar ki, o kimyəvi qarışıqların nə qdər ziyanlı olmasın anlasınlar. Axı, dünyada qızıl və mis mədənlərinin açıq üsulla istismarı çoxdan qadağan edilib. Bu gün kənd sakini olan yaşlı qadın bir daha deyib ki, "gölün zəhəri bizi qırır".

Plakat və bannerləri nəşr edən mətbə sahibi narkotika ittihamı ilə saxlanılıb. İnzibati xətalarla həbs edilənlər hamısı saxta ittihamlarla sənədlərşdirilib, saxta məhkəmə hökmləri çıxarılıb. Yaşlı qadınların üzərinə polis qüvvələri yeridən, ağbircək ananın gözlərinə bibər qazı üfürən polisin, haqqın tələb edən qadının kürəyinə dəyənək zərbələri endirən "hüquq keşikçisinin" əməlləri barədə kim izahat verəcək? Hakimiyyət öz vətəndaşı ilə əsir aldığı kölə kimi rəftar edir.

Artıq bir neçə gündür Söyüdlüyə giriş-çıxış məhdudlaşıdırılıb. Kəndin girəcəyinə post qoyulub. Kənar adamlar, jurnalist və blogerlər, hətta qonşu kəndlərdə yaşayan Söyüdlülər kəndə buraxılmır. Polis səlahiyyət həddin aşıb. Fövqəladə vəziyyət, xüsusi rejim tətbiq etmək, vətəndaşların ölkə daxilində hərəkət azadlığın məhdudlaşdırmaq polisin səlahiyyətində deyil. Açıq-aydın DİN konstitusiyaya məhəl qoymur.

Söyüdlü məsələsində Milli Məclisin deputatları trol kimi çıxış edir. Hökumət rusnamələri və yandaş mirzələr "yalançının kor şahidləri" kimi tökülüblər Söyüdlülərin üzərinə. Yağlar yağ üstə gedir, yarmalar yavan qalır. İlham Əliyevin "uğurlu" hüquqi islahatlarından sonra ölkə belə çarəsiz vəziyyətə düşüb.