• contact.az Contact
  • Bakı
  • Clear9.70 C
  • Bazar ertəsi, 23 Dekabr 2024
    • flag_EN
    • flag_RU

Son yenilənmə

(2 saat əvvəl)
"Vətənpərvərlər" niyə artıb? - Seymur Baycan yazır...
A- A A+
Turan İnformasiya Agentliyi
Turan İnformasiya Agentliyi

"Vətənpərvərlər" niyə artıb? - Seymur Baycan yazır...

Kütləvi repressiyalar, kütləvi nəzarət, kütləvi qorxu sovet vətəndaşlarını o qədər yormuş, o qədər əldən salmışdı ki, xeyli adam almanların hücumuna, müharibənin başlamağına sevinmişdi. Repressiyalardan, kütləvi nəzarətdən bezmiş, yorulmuş adamlar almanların hücumunu, müharibənin başlamasını bir az dincəlmək, bir az rahat nəfəs almaq fürsəti kimi qiymətləndirirdi. Təsəvvür edin repressiyalar, kütləvi nəzarət, qorxu mühiti adamları o qədər yorub və bezdirib ki, onlar müharibənin başlamağına seviniblər. Həddindən artıq absurd, qəribə görünsə də, həqiqətən, belə bir hal olubdur. Bu barədə hətta Konstantin Simonov "Dirilər və ölülər" əsərində yazıb. Əlbəttə, xeyli üstüörtülü şəkildə.
 
İndi Azərbaycanda da, təxminən, buna bənzər bir vəziyyət yaranıb. O məşhur sözü bir az vəziyyətə uyğunlaşdırsaq, belə bir "resept" alınar:
 
“Əgər səni təhqir edirlərsə, əgər səni alçaldırlarsa, əgər sənin bir insan, bir vətəndaş kimi bütün hüquqların əlindən alınıbsa, sərhədlərini bağlayıb səni qoyun sürüsü kimi tövləyə doldurublarsa və sən səsini çıxarıb “mıqq” da edə bilmirsənsə, qorxursansa, acizsənsə, nəyəsə görə susursansa, çalış alovlu vətənpərvər ol”.
 
Acizlik, qorxu və laqeydlik nəticəsində son vaxtlar ölkədə "vətənpərvərlərin" sayı yaman artıb. Bu "vətənpərvərlər" vaxtaşırı bir "günah keçisi", "qurban", "vətən xaini", "düşmən dəyirmanına su tökən" tapıb onun üstünə nifrət, qəzəb püskürürlər. Özlərinə insan, vətəndaş olduqlarını sübut etmək istəyirlər. Guya bunların da bir insan, bir vətəndaş kimi hissləri, qırmızı xətləri var. Guya vətən dardadır, bütün umu-küsüləri kənara qoyub bir yumruq kimi birləşmək lazımdı.
 
Amma müharibə veteranı intihar edəndə bu adamlardan səs çıxmır. Çünki "günah keçisi"nin, "vətən xaini"nin üstünə nifrət, qəzəb püskürmək onlara sərf edir, onlara xal gətirir. "Vətən xaini"nin, "günah keçisi"nin üstünə xoruzlanmaq təhlükəsizdir. Bununla onlar həm də bir insan, bir vətəndaş kimi öz acizliklərinə, qorxaqlıqlarına legitimlik qazandırırlar. Müharibə veteranının intiharına reaksiya vermək isə onlara sərf etmir. Beləliklə onların vətənpərvərliyinin nə qədər saxta olduğu asanlıqla üzə çıxır. Belə saxta vətənpərvərlərin bu qədər çoxalması yaxşı heç nə vəd etmir.
 
Təhqir olunmuş cəmiyyətlər çox qorxuludur. Hər dəqiqə bir xəstə təxəyyülü adam ortaya çıxıb təhqir olunmuş cəmiyyətin boğazına xalta bağlayıb istədiyi istiqamətə apara bilər. Ötən əsrin 30-40-cı illərində Almaniyada baş verənlər buna sübutdur. Hitler bəşər mədəniyyətinə neçə-neçə dahilər bəxş etmiş almanları heyvan sürüsünə çevirdi. Almanlar heyvan sürüsünə çevrilməyə tam hazır idi. Çünki almanlar özlərini təhqir olunmuş hiss edir və "Versal" dan sonra oturub öz “hitlerlərinin” yolunu səbirsizliklə gözləyirdilər.
 
Orduda olanlar, yəqin ki, belə halları çox müşahidə ediblər. Ən çox döyülən və təhqir olunan əsgərlər fürsət yarananda ən qəddar, ən amansız adama çevrilirlər. Fağırın qeyrətə gəlməyi çox pis olur. Xülasə, təhqir olunmuş və aciz görünən cəmiyyətlər hazır barıt çəlləyidir. Təhqir olunmuş cəmiyyətlərdə hətta ayıq-sayıq, ağıllı adamlar belə asanlıqla kütləyə qoşulur, könüllü olaraq kütləyə əsir düşürlər. Kütlə isə hər zaman düşündüyümüzdən də səviyyəsiz, düşündüyümüzdən də qorxuludur.
 

Rəy yaz

Söz istəyirəm

  • "Beynəlxalq Humanitar Hüquq üzrə Könüllü Hesabat: İnsanlığın Müdafiəsində Ukraynanın Səsi" Söz istəyirəm
    • 20 Dekabr 2024, 19:40

    "Beynəlxalq Humanitar Hüquq üzrə Könüllü Hesabat: İnsanlığın Müdafiəsində Ukraynanın Səsi"

    Müasir müharibələr insanlığın dözümlülüyünü sınağa çəkir, prioritetləri və dəyərləri yenidən nəzərdən keçirməyə məcbur edir. Belə dövrlərdə yalnız güc nümayiş etdirmək deyil, həm də beynəlxalq hüququn və insanlığın prinsiplərinə bağlılığı göstərmək xüsusilə vacibdir. Rusiya Federasiyasının misilsiz silahlı təcavüzü ilə üzləşən Ukrayna, beynəlxalq humanitar hüququn (BHH) normalarına sadiqliyini qoruyaraq, bu təcavüzə müqavimət göstərir. Ukrayna Müdafiə Nazirliyi tərəfindən təqdim olunan Könüllü Hesabat şəffaflıq, məsuliyyət və ədalət axtarışının simvoluna çevrilib.

    Ardını oxu
  • Müstəqil media olmasa Dövlətə güzgü tutan olmayacaq Söz istəyirəm
    • 20 Dekabr 2024, 14:29

    Müstəqil media olmasa Dövlətə güzgü tutan olmayacaq

    Prezident İlham Əliyev RİA agentliyinə verdiyi müsahibədə Azərbaycanda xaricdən maliyyələşən medianın qarşısının alındığını dedi və söylədi ki, Azərbaycan ABŞ-da, Avropada heç bir medianı maliyyələşdirmirsə, onlar nədən bunu bizim ölkədə etməlidir?!

    Ardını oxu
  • Dövlət başçısına məktub Söz istəyirəm
    • 19 Dekabr 2024, 09:49

    Dövlət başçısına məktub

    Azərbaycan Respublikasının Prezidenti cənab İlham Əliyevə və Azərbaycan Respublikasının Vitse-Prezidenti xanım Mehriban Əliyevaya Göndərən: Amina Fevzi qızı Hacıyeva (Beynəlxalq Bankın keçmiş sədri Cahangir Hacıyevin bacısı)

    Ardını oxu
  • Natiq Cavadlı – Dürüstlük və Ədalətin Simvolu Söz istəyirəm
    • 12 Dekabr 2024, 15:39

    Natiq Cavadlı – Dürüstlük və Ədalətin Simvolu

    İctimai xadim və alim Dr. Cəmil Həsənli, Meydan TV-nin jurnalisti Natiq Cavadlının qaçaqmalçılıqda ittiham olunaraq dörd aylıq istintaq təcridxanasına salınmasına görə dərin narahatlığını ifadə edib. Onu tanıyanlar üçün bu hadisə inanılmaz görünür. Dürüstlüyü, intellekti və həqiqətə bağlılığı ilə tanınan Cavadlı Azərbaycanın ən hörmətli jurnalist və ziyalılarından biri hesab olunur.

    Ardını oxu

Bizi sosial şəbəkələrdə izləyin

Xəbər lenti