Asim Mollazadə: Avropa Birliyi məsuliyyəti üzərinə götürməlidir

Milli Məclisin deputatı Asim Mollazadə “Amerikanın Səsi”nə müsahibəsində enerji təhlükəsizliyi, neft və qazın daşınması, regiondakı münaqişələrin həlli yolları, enerji dəhlizinin hərbi təhlükələrdən qorunmasından danışıb.

Sual: Azərbaycanın hazırki enerji siyasətinin Avropanın təhlükəsizliyində rolunu necə qiymətləndirirsiniz?

Cavab: Azərbaycan Avropanın enerji təhlükəsizliyində çox mühüm rol oynamağa başlayıb. Söhbət ilk növbədə Azərbaycanın həyata keçirdiyi qaz boru kəmərləri layihələrindən (TAP, TANAP) gedir. Azərbaycan hazırda cənubi, şərqi və qərbi Avropanın enerji təhlükəsizliyi üçün vacib layihələri həyata keçirir. Azərbaycan həm də həyata keçirdiyi uzunmüddətli layihələrlə Xəzərin şərq sahillərindəki ölkələr üçün böyük perspektivlər açır. Çünki Trans-Xəzər boru xətləri inşa edilərsə yalnız Xəzər qazı deyil, Orta Asiya ölkələrinin qazı da Avropaya çatdırıla bilər.

Sual: Qərb-İran razılaşmasından sonra bölgənin enerji siyasətində hansı yeniliklər ola bilər?

Cavab: Müvafiq qərarlar qəbul edilərsə, o zaman Azərbaycanın Transanadolu (TAP) şəbəkəsindən bir sıra ölkələr, o cümlədən İran da istifadə edə bilər.

Sual: Türkmənistan prezidenti bildirib ki, türkmən qazının Avropaya çatdırılması üçün Azərbaycan, Avropa İttifaqı, Gürcüstan və Türkiyə ilə danışıqlar davam etdirilməlidir. Bu danışıqların perspektivini necə görürsünüz?

Cavab: Avropa Birliyi bu istiqamətdə məsuliyyəti öz üzərinə götürməlidir. Daha cəsarətli addımlar atmalıdır. Təbii ki, Transatlantik əməkdaşlığın da bu qərarların verilməsində böyük önəmi var. ABŞ həm Transxəzər boru xətlərini, həm də Azərbaycanın Cənub Dəhlizi istiqamətində apardığı işləri dəstəkləyir. Həm Avropa Birliyinin, həm də ABŞ-ın dəstəyinin böyük əhəmiyyəti var.

Sual: Layihələrin hərbi-siyasi təhlükəsizliyi ilə bağlı görülən işləri necə qiymətləndirirsiniz? Təhlükəsizliyə təminat verilirmi?

Cavab: Çox təəssüf ki, bizim bölgədə, yəni Cənubi Qafqaz bölgəsində münaqişələr indiyədək həllini tapmayıb. Bu münaqişələr Avropanın enerji təhlükəsizliyi üçün ən böyük təhdiddir. Tam təhlükəsizlik təminatı münaqişlərin həllindən keçir. Biz Avropa Birliyinin, ABŞ-ın bu istiqamətdə roluna böyük önəm veririk.

Sual: Beynəlxalq təcrübə göstərir ki, bir çox hallarda münaqişələr deyil, perspektiv daxili təhlükəsizliyi olmayan ölkələr layihələrə böyük təhlükələr törədir. Bu baxımdan region ölkələrində daxili təhlükəsizliyi necə qiymətləndirirsiniz?

Cavab: Mənə elə gəlir ki, ən azı Azərbaycan və Türkiyə bölgədə stabilliyi təmin etmək üçün əsas qüvvələrdir. Bu ölkələrdə stabillik və layihələri həyata keçirmək üçün çox böyük potensial var. Müttəfiqlərin dəstəyi ilə stabillik təmin oluna bilər. -03B-