Aslan İsmayılov: Azərbaycan hüquq sistemi çoxdan süqut edib

“Mənim vəkillikdən xaric edilməyim ancaq və ancaq ictimai fəaliyyətimlə bağlıdır. Çünki vəkillikdən xaric olunmağım üçün heç zaman əsas olmayıb”. Bu barədə vəkil Aslan İsmayılov Obyektiv televiziyasına (www.obyektiv.tv) müsahibəsində bildirib.

İsmayılov bundan öncə 1999-cu ildə vəkillikdən xaric edilib, 2005-ci ildə prezidentlə görüşdən sonra vəkillik fəaliyyəti bərpa edilib.

“2010-cu ildən sonra hakimiyyətin siyasətini kəskin tənqid etməyə başladım, həbs olunan gənc fəalların aktiv şəkildə müadifəsinə qoşuldum. Bundan sonra mənə bir neçə dəfə xəbərdarlıq etdilər. Bu il mayın 8-də Vəkillər Kollegiyasının Rəyasət Heyəti vəkillikdən xaric olunmağımla bağlı qərar verdi və məhkəməyə müraciət etdi. Mayın 16-da məni zorla polis idarəsinə apardılar və orada polis rəisi mədəni şəkildə xəbərdarlıq etdi ki, bütün xətləri keçmisiniz, özünüzü yığışdırın. Mayın 30-da Daxili İşlər Nazirliyinin Baş Mütəşəkkil Cinayətkarlığa qarşı Mübarizə İdarəsinə apardılar. Orada məni vurdular, təhqir etdilər, sonra isə ölümlə təhdid etdilər və dedilər ki, bu, sənin son şansındır, əgər yaşamaq istəyirsənsə, sus. Bir daha deyirəm, bu Azərbaycan hakimiyyətinin danışanın dilini kəsmək, eşidənin qulağını tıxamaq, görənin gözünü çıxarmaq cəhdidir”, deyə o bəyan edib. 

Onun fikrincə, Azərbaycan hüquq sistemi çoxdan süqut edib, müstəqil məhkəmə sistemindən danışmaq isə yersizdir. “Bunun göstəricisi odur ki, bir nəfər belə Azərbaycan vətəndaşı inanmır ki, haqqı pozulan məhkəmədə ədalət tapa bilər. Hamı deyir ki, məhkəmədə nəyəsə nail olmaq istəyirsənsə, “haqqını verirsən, haqqını alırsan”, deyə o rişxəndlə bildirib.

Vəkil deyib ki, ictimai-siyasi rəngli işlərdə Azərbaycan məhkəmələri müstəqil qərar qəbul edə bilməz. “Digər qərarlar isə korrupsiya istiqamətində qəbul edilən qərarlardır”.

İsmayılov aşağı məhkəmənin qərarından apellyasiya şikayəti verəcək, sonra Ali Məhkəməyə və Avropa Məhkəməsinə müraciət edəcək. “Azərbaycan məhkəmələrinə müraciətdə məqsədim ədaləti bərpa etmək deyil və bu, mümkün deyil. Sadəcə hər dəfə məhkəməyə müraciət etməklə məhkəmə sistemini ifşa edəcəyəm. Məhkəmələrin sifarişlə işləməsini ictimailəşdirəcəyəm və şikayətlərimi davam etdirəcəyəm”, deyə o qeyd edib. -03B-