Bəraət almış hüquq müdafiəçisi Rəsul Cəfərov siyasətə qoşula bilər

Bakı/23.04.20/Turan: 2020-ci il aprelin 23-də Azərbaycan Ali Məhkəməsinin Plenumu REAL partiyasının sədri İlqar Məmmədovun və İnsan Hüquqları Klubunun sədri Rəsul Cəfərovun məhkumluğunu götürüb və onların barəsindəki ittihamları ləğv edib.

Məhkəmə Məmmədov barəsindəki bütün məhkəmə qərarlarını ləğv edib və bütün cinayət işləri üzrə ona bəraət verib. İlqar Məmmədova qanunsuz həbsinə və ona vurulmuş mənəvi ziyana görə 234 min manat təzminat ödəniləcək.

Ali Məhkəmə İlqar Məmmədovun mənəvi ziyana görə təzminat və digər məsələlərlə bağlı mülki qaydada məhkəməyə müraciət etmək hüququnu saxlayıb.

Rəsul Cəfərovun məhkumluğu da götürülüb. O, 2014-cü il avqustun 2-də həbs edilib. Baş Prokurorluğun Ağır Cinayətlərə dair İşlər üzrə İstintaq İdarəsində ifadə verdikdən sonra ona qarşı Cinayət Məcəlləsinin qanunsuz sahibkarlıq, vergilərdən yayınma və vəzifə səlahiyyətlərini aşma maddələri ilə ittihamlar irəli sürülüb. Bakı Ağır Cinayətlər Məhkəməsinin hökmü ilə Cəfərov 6 il 6 ay müddətinə həbs edilib. O, 179-cu (mənimsəmə) və 313-cü (sənədləri saxtalaşdırma) maddələrlə ittiham olunub. Bakı Apellyasiya Məhkəməsində cinayət işinin 213-cü (vergilərdən yayınma) maddə üzrə hissəsinə xitam verilib. Cəza müddətindən 3 ay çıxarılıb və 6 il 3 ay azadlıqdan məhrumetmə hökmü qüvvədə saxlanılıb. R.Cəfərov 2016-cı il martın 17-də prezident İlham Əliyevin imzaladığı əfv fərmanı ilə azadlığa çıxıb.

Rəsul Cəfərov Turan-ın suallarını cavablandırıb.

- Sevindirici hadisə münasibətilə təbrik edirəm. Bəraət haqqında xəbəri necə qarşıladınız? Sizi həbsxanaya salan hüquq müdafiə fəaliyyəti ilə əbəs yerə məşğul olmağınızla bağlı məyusluğunuz var?

- Təbii ki, şadam, Plenumun qərarını müsbət qiymətləndirirəm. Belə ki, gec də olsa, tamamilə bəraət aldım. Mənim seçdiyim yolla bağlı şübhəm yoxdur. Son nəticədə barəmdə doğru qərar qəbul ediləcəyinə güclü inancım var idi. Bu hadisə həddindən artıq uzandı və bu, nə dövlətə, nə də cəmiyyətə lazım deyildi. Həmçinin, məlum olduğu kimi, siyasi dialoq çərçivəsində məlum görüşlər olub, İlqar Məmmədov bu barədə cəmiyyəti məlumatlandırıb. Amma, əlbəttə ki, yekun qərarı bilmək üçün bu günü gözləmək lazım idi.

Mənim seçdiyim yolla bağlı şübhəm yoxdur. Yalnız səbəbsiz yerə illərimi həbsdə keçirdiyimə təəssüf edirəm. Bu illərdən səmərəli istifadə edə bilərdim. Bununla belə, yanlış yolda olduğumu düşünmürəm. Əksinə, mən insanlara xidmət edirdim və bu fəaliyyət həmişə mənə mənəvi məmnunluq hissi verirdi.

- İndi, Ali Məhkəmənin Plenumunun qərarından sonra nə ilə məşğul olacaqsınız?

- Həbsdə olarkən belə insan hüquqlarının müdafiəsi ilə məşğul olmağa və REAL partiyasını təmsil etməyə davam edirdim. Azadlığa çıxdıqdan sonra da bununla məşğul olurdum. Bundan sonra da məşğul olmağa davam edəcəyəm. Siyasi fəaliyyətimin hüquq müdafiə fəaliyyətim üzərində üstünlük təşkil edəcəyi də istisna deyil.

- Hakimiyyətdən azad edilmə və ya bəraətlə bağlı təkliflər daxil olub?

- Təklif olmayıb. Siyasi dialoq çərçivəsində hakimiyyətin İlqar Məmmədovla dialoqu olub və bizim işimiz ölkə qanunvericiliyi çərçivəsində həll olunub.

- Siyasi məhbusların azad edilməsi barədə yeni qərarlar gözləmək olar?

- Mən bunu istisna etmirəm.

- Baş verənləri ölkədə demokratikləşmənin başlanğıcı kimi başa düşmək olar?

- İndi baş verən hadisələrin nəyə gətirib çıxaracağını demək tezdir. Amma bu hadisələr müəyyən müsbət siqnallar verir. Buna görə onların ümumi demokratikləşmə prosesinə, hüquq və azadlıqlar sahəsində mövcud problemlərin həllinə təkan verəcəyinə ümid edək. Koronavirus karantini başa çatdıqdan sonra siyasi dialoqun genişlənəcəyinə ümid edirəm. Amma indi qəbul edilmiş qərarların nəticələrini dəqiq proqnozlaşdırmaq çox çətindir.--0--