Cavad Heyətin səhhəti ağır olaraq qalır

Doktor Cavad Heyət hazırda Bakıda Mərkəzi Gömrük Hospitalının reanimasiya şöbəsinə yerləşdirilib. Səhhəti ağır olaraq qalır.  Bu barədə Cavad Heyətin yaxın qohumu Zülfü Baxşəli Turan agentliyinə bildirib.

Cavad Heyət 1925-ci il mayın 24-də Təbrizdə anadan olub. O, cərrah-alimdir. İranda ilk dəfə açıq ürək əməliyyatını (koronar şuntlama) gerçəkləşdirib, Beynəlxalq Cərrahlar Cəmiyyətinin idarə heyətinin və Paris Cərrahlar Akademiyasının üzvüdür. Tehranda Azərbaycan dilində çap edilən “Varlıq” dərgisinin təsisçisi, türkologiyaya aid yeddi cildlik kitabın müəllifidir. Azərbaycanın müxtəlif universitetlərinin fəxri doktoru və professoru, Türk Dil Qurumunun fəxri sədri, eləcə də İstanbul Universitetinin fəxri doktorudur.

Z.Baxşəlinin sözlərinə görə, Cavad Heyət qansızlıqla bağlı xəstəxanaya müraciət edib. “Sonra da pnevmaniya diaqnozu qoyublar. Doktor Cavad hazırda yaxınlarını tanıyır, çünki kənar şəxsləri yanına buraxmırlar. Qızını tanıdı, məni tanıyır. Danışığına həkimlər imkan vermir, danışa bilmir. Çünki danışmaq istəyir, amma çox zəifliyi ilə əlaqədar danışmır”, deyə o qeyd edib.

O, həkimlərin Cavad Heyətin səhhətinin normalaşacağına ümid etdiyini bildirib. “Həkimlər ümid bəsləyirlər... Amma səhhəti ağır olaraq qalır”. -03B-