Cəmil Həsənli ona qarşı hazırlanan təxribatı ifşa etdi FOTO

“Həbsimdən fiziki məhvimə qədər bütün variantları müzakirə ediblər”

“Qızımla bağlı baş verənlər daxili işlər nazirliyi və xüsusi xidmət orqanları tərəfindən başlanmışdı”

Milli Şuranın sədri Cəmil Həsənli yeni bir təxribatla üz-üzədir. Onun qızı Günel Həsənli avtomobillə adam vurub, hadisəni gizlətməkdə ittiham olunur. Hiss olunur ki, Milli Şura sədrinə ondan qızı ilə intiqam ala biləcəkləri mesajını verirlər. Baş verənlərlə bağlı Cəmil Həsənli ilə söhbət etdik.

- Cəmil bəy, sizə qarşı təzyiqlərin son vaxtlar güclənməsi nə ilə bağlıdır?
- Düzünü deyim ki, mən bu təzyiqləri 20 ildir öz üzərimdə hiss edirəm. Amma ötən ilin avqust ayının sonuncu həftəsindən başlayaraq bu daha iyrənc xarakter almağa başladı. Prezident seçkilərində teledebatlar hakim zümrə üçün gözlənilməz olduğundan sentyabrın sonunda məndən canlarını qurtarmağın müxtəlif  yollarını müzakirə edirdilər. Təsəvvür edin ki, həbs olunmadan fiziki məhvə qədər bütün variantlar müzakirə edilirdi. İlk müzakirələr YAP-ın ofisində başlamışdı. Yeni Azərbaycan Partiyasının  rəhbərliyi öz bacarıqsızlığını mənim həbsimlə kompensasiya etmək istəyirdi. Biz YAP qərargahında gedən proseslərdən məlumatlı idik. Hətta birinci debatdan əvvəl Əli Əhmədovun mənim əleyhimə “kompromat” gətirəcəyi və onun nədən ibarət olacağı artıq mənə bəlli idi. Sonrakı debatlarda Səyavuşun miskin vəziyyətə düşməsi partiya rəhbərliyində çoxlarının ürəyincə olmuşdu. Ancaq onlar mənə aqressiv münasibətləri ilə bunu pərdələməyə çalışırdılar. Az sonra  mənimlə bağlı müzakirələr Prezident Aparatına keçiriləndə məsələnin ciddiliini anlayanlar oldu və bəzi məsul şəxslər bu addımların ağır nəticələr verə biləcəyi fikrini səsləndirdilər.

- İndi isə sizə görə qızınızla bağlı təxribat törədirlər...
- Günellə bağlı baş verənlər daxili işlər nazirliyi və xüsusi xidmət orqanları tərəfindən başlanmışdı. Onun bütün hərəkət trayektoriyasını izləyirdilər. Əvvəlcə öz təbiətlərinə uyğun bir şey "tapmağa" üstünlük verirdilər. Belə bir hal aşkar edə bilmədilər və bu istiqamətdə ümidləri doğrulmadı. Lakin sentyabrın 15-də dərslər başlayandan sonra onun günortalar uşaqlarını hər gün məktəbdən gətirməsi gündəlik hərəkət marşurutu idi. Çünki bizim binanın və xüsusilə qarajın qarşısında çoxdan nəzarət qoymuşdular. Üzərinə taksi tanınma nişanı qoyulmuş maşınlarda oturub gözləyirdilər. Bəzən maşınların üzərinə Rusiya nömrələri də yapışdırılırdı. İzləməni itirəndə guya “uqon” maşın axtarışı məqəsdilə qaraja girib Günelin və mənim maşınımın yerində olub olmadığını dəqiqləşdirirdilər. Nə vaxt gedib gəldiyimizi qeydə alırdılar. Hadisənin törədildiyi cümə günün özü də təsadüfü seçilməmişdi. Sadəcə həmin vaxt qonşuluğumuzda olan Ilahiyyat məscidinə cümə namazına gələnlərin sayı çox olduğundan adam və maşın əlindən tərpənmək mümkün olmur. Əməliyyatın məhz həmin yerdə və həmin saatda həyata keçirilməsi təsadüfü deyildi. Təsəvvür edin ki, hər gün yüzlərlə belə və bundan daha ağır hadisələr baş verir. Daxili işlər nazirliyi bunların hansı haqqında xüsusi açıqlama ilə çıxış edir? Elə son bir ay ərzində son dərəcə ağır, çoxlu sayda insan itkisi ilə nəticələn yol-nəqliyyat hadisələri baş verib. Belə hadisələr olsa-olsa avtomobil müfəttişliyinin, Yol Patrul Xidmətinin məlumatlarında yer alır. Amma diqqət yetirin Günel Həsənli ilə bağlı baş verən olayda ölüm hadisəsi yox, xəsarət yox, lakin bilavasitə DİN özü açıqlama ilə çıxış edir. Bu yalnız mənə görə, mənim vətəndaş mövqeyimə, siyasi fəaliyyətimə görə idi.

- DİN-in sözçüsü Ehsan Zahidovun açıqlamasında isə deyilir ki, Günel həkimə yalan danışıb, qadın yıxılıdığını bildirib... 
- Biz ötən dəfə müayinə prosesində polisin iştirakını foto materialla ortaya qoyduq. Necə ola bilər ki, daxili işlər nazirliyinin əməkdaşının iştirakı ilə Respublika xəstəxanasının qəbul otağında belə bir söhbət olsun. Adilə xanım hələ maşında xəstəxanaya gedəndə özü deyib ki, sınığım olsa şikayətçiyəm, olmasa deyəcəm yıxılmışam. Günel xəstəxananın qəbul otağında sorğulara cavab olaraq deyib ki, bu qadın mənim maşınıma toxunub. Müayinədən sonra sınıq və xəsarət izləri olmadığından, məhz Adilə xanım özü deyib ki, mənim başım fırlanıb yıxılmışam və bu qız da məni gətirib bura. Onun sözləri qeydiyyat kitabına yazılıb, xanım da imzası ilə onu təsdiq edib. Bu qeydin surəti bizdə var və lazım olsa, ortaya qoyulacaq. Yəni cənab Zahidovun açıqlamasının bu hissəsi də bizə münasibətdə böhtan xarakteri daşıyır. 

- Bəs onda DİN niyə qəflətən bu məsələyə qayıtdı?
- Bunun səbəbi başqadır. İndi mən sizə izah edim ki, DİN-in mətbuat xidməti niyə axıra qədər öyrənmədiyi və müvafiq orqanların bilərəkdən qeydə almadığı bu hadisə barədə yalan açıqlama verdi. Bu açıqlama Güneldən daha çox mənə aid idi. Məsələ burasındadır ki, biz sentyabr ayının sonlarında siyasi məhbusları müdafiə etmək məqsədilə mitinqlər barədə müzakirələr aparırdıq. Sentyabrın 29-da AXCP-nin Rəyasət Heyəti məsələni müzakirə edib müsbət qərar qəbul etmişdi. Bir gün sonra isə Milli Şura qərar verməli idi. Məhz sentyabrın 29-da Güneli polisə çağırdılar və müvafiq polis orqanlarına məlum olan “hadisəni” rəsmiləşdirdilər. Adilə xanım isə məhz polis işçilərinin tövsiyəsi ilə “xəsarət aldığını” yenidən xatırlamış və hüquq mühafizə orqanlarına müraciət etməli olmuşdu. Təhqiqat zamanı əvvəlcə Günelin maşınına baxış keçirib onu buraxmaq istəsələr də, yuxarıdan gələn zəng maşının cərimə meydançsına göndərilməsi ilə nəticələnmişdi. Yeri gəlmişkən, baxış keçirilməsi başa çatdırılsa da, hadisə yerində və maşında hər hansı bir izin olması müəyyən edilmədiyi mənim iştirakımla Günelə elan edilsə də, bu günə qədər onun maşını cərimə meydançasından buraxılmayıb. 
Biz sentyabrın 30-da Landmarkın 19-cu mərtəbəsindəki restoranda çay stolu arxasında mitinqlərə başlamaqla bağlı Milli Şuranın Koordinasiya Mərkəzinin müzakirəsini keçirdik. Həmin vaxt DN-in müvafiq idarəsinin iki əməkdaşı da bizimlə bərabər qonşu stolda “çay içir” və şübhəsiz ki, bizi dinləməkdən ibarət olan vəzifələrini də yerinə yetirirdilər. Mən onları tanıyırdım və biz mümkün qaydada DİN əməkdaşlarının bizi dinləmələrini təsbit etdik. Görünür, dinlənilən müzakirənin nəticələri hakimiyyət orqanları üçün elə də ürək açan olmayıb və məhz bundan sonra bizə qarşı əməliyyatın ikinci mərhələsinə start verildi.

- İnformasiya hücumu necə başladı?
- Günelin telefon nömrəsini çox az adam, demək olar ki, ailəmizə ən yaxın adamlar bilir. Sentyabrın 28-i axşamı onun telefonuna “Whatsapp” proqramında bir mesaj gəldi.  “Salam. Necəsiniz?” Günel soruşur: kimsiniz? O, isə deyir: “Tanımadınız, özünüz verdiniz ki, nömrəni adım Emindir. Yadında deyil, Yasamalda qaraja dönəndə qaraçı qadını vurdunuz”. Günel deyir: “Mən qadın vurmamışam, mənim maşınıma dəyib yıxılan qadın isə qaraçı deyil və soruşur ki, mən özüm sizə nömrə vermişəmsə fotonu qoy görüm kimə nömrə vermişəm”. O, isə deyir ki, mən foto çəkdirməyi xoşlamıram və “Whatsapp”a da şəkil qoymuram. Bundan sonra Günel onu blok edir. Oktyabr ayının 2-də 12:42-də Servet Eloqlu adlı bir nəfər öz fb səhifəsində bu məzmunda bir məlumat yayıb və məlumatın altında da bir meyit şəkili qoyub:

"ŞOK, ŞOK, ŞOK....
Bu gün eşitdiyim bir xəbəri dostlarla bölüşmək istəyirəm. Xəbər həmişə ağızdolusu haqq-ədalətdən, obyektivlikdən dəm vuran, qanunların aliliyinə riyaət etməyi guya tələb edən Milli Şuranın sədri Cəmil Həsənli ilə bağlıdır. Belə ki, təxminən 10 gün bundan əvvəl Cəmil müəllimin qızı Günel xanım gündüzün günorta vaxtı Yasamal rayonu ərazisində KİA markalı avtomobili idarə edərkən yolu keçən 86 yaşlı bir qadını vurub. O vurduğu qadını xəstəxanaya aparsa da məsuliyyətdən yayınmaq məqsədilə həkimlərə yalan danışıb: deyib ki bu qadın yolda yıxılmışdı, mən də gətirdim....Lakin sonradan hüquq-mühafizə orqanlarına bununla bağlı məlumat daxil olub. Araşdırılıb və məlum olub ki, xanım yalan deyib. O yol nəqliyyat hadisəsi törədib və nəticədə 86 yaşlı qadın ağır bədən xəsarəti alıb....
Səmimi deyim ki, şəxsən mən buna sevinmirəm, amma yenə də deyirəm ki, həmişə ağızdolusu haqq-ədalətdən, obyektivlikdən dəm vuran, qanunların aliliyinə riyaət etməyi guya tələb edən Milli Şuranın sədri Cəmil Həsənlinin tərbiyəsi ilə böyüyən Günel xanım bir insanın xəsarət alması ilə nəticələnən qəza törədir və məsuliyyətdən kənarda qalmaq üçün bu boyda yalan danışır....Allah həm yaralı qadına,həm də Günel Həsənliyə kömək olsun.... ".

Maraqlıdır ki, Server Eloqlu-nun yaydığı mətnlə Ehsan Zahidovun günün ikinci yarısında yaydığı mətn eynidir. Üstəlik, saat 12:42-də Servet Eloqlunun fb səhifəsində yayılan bu məlumat həmin gün saat 11:49-dan başlayaraq  “hafta.az”, SİA, “müsavat.com”, “vatanpress.az” və digərlərində ayrı bir formada yayılmışdı. İstinad kimi isə fb-daki nəlumat göstərilirdi. Yəni araba atdan qabağa keçmişdi.

Şübhəsiz ki, bu müvafiq xidmət orqanlarının işi idi və qısa müddətdə də nəzarət etdikləri şəbəkədə yayılmışdı. Amma mən yolda dayanıb saytlarda gedən bu yalan məlumatları tez save etdim. Çünki bilirdim ki, mavr öz işini görəndən sonra gedəcək. Maraqlıdır ki, saat 11:03-də “Hafta.az”dan mənə zəng gəldi ki, bəs sizin qızınız maşınla adam vurub, ağır vəziyyətdə olan qadını qoyub qaçıb. Mən isə bildirdim ki, mənim qızım adam vurmayıb və hansısa bir yaralını da hadisə yerində qoyub qaçmayıb. Həmin gün mən 14:30-da evə qayıdanda gördüm ki, bəzi saytlar arıq məlumatı yığışdırıblar. Mən hadisənin bəzi məqamlarına aydınlıq gətirən birinci açıqlamanı saat 15-də “Azadlıq” və “Turan”a göndərəndə təxmin edirdim ki, hökumət tərəfindən hansısa açıqlama olacaq. Ona görə məsələnin detallarına getmədim. Belə də oldu. Az sonra  E.Zahidovun adından DİN-in gözlənilən açıqlaması gəldi və rəsmi dövlət orqanı ictimaiyyətə hadisə barədə yalan məlumat verdi. Biz onun hər cümləsinin yalan olduğunu faktlarla qoyduq ortaya, bəzi faktlar isə hələ sonra açıqlanacaq.

- Söhbətin əvvəlində dediniz ki, 20 ildir özünüzü təzyiq altında hiss edirsiniz. Amma açığı, Sizin yalnız 2013-cü il seçkilərindən sonra və niyə hədəfə gəldiyinizi təsəvvür etmək mümkündür. Buna qədər nələr olub ki?..
- 1995-ci ildə OMON hadisələri ilə bağlı məni həbs etmək istəyirdilər. Guya mən OMON-cuların qərargahında çıxış edib, onları hökumətə qarşı mübarizəyə çağırmışam. Evimdə axtarış apardılar. Hər şey hazır idi, o cümlədən həbs orderi də. Onu icra etmək üçün iki çəpgöz, yüksək yağlılıq dərəcəsindən qırxıq başları mərmər kimi parıldayan qoluzorlular məni aparmağa müntəzir idilər. Halbuki, mən heç indi də bilmirəm ki, OMON-un qərargahı harada yerləşir...