Cənubi Azərbaycan Demokratik Respublikasının yaradılmasının növbəti ildönümü

Cənubi Azərbaycanda “21 Azər” adı ilə tanınan milli hökumətin elan olunmasının (14 dekabr 1945-ci il) 67-ci ildönümü tamam olub. 

Ümumdünya Azərbaycanlıları Konqresinin Daimi Şurasının sədri Əjdər Tağızadə Obyektiv TV-yə  (obyektiv.tv) müsahibəsində deyib ki, bu, milli-azadlıq hərəkatının tipik nümunəsi idi.

Pişəvəri hökumətinin fərmanları ilə dövlət dili təsdiq edilib, Təbriz Universiteti yaradılıb, səhiyyə, təhsil və torpaq islahatları aparılıb, qadınların bütün siyasi və mülki azadlıqları təmin olunub, 8 saatlıq iş günü müəyyən edilib.

Bütün bu islahatlara, həyat şəraitinin yaxşılaşmasına baxmayaraq, geosiyasi oyunçular (ABŞ, SSRİ və Böyük Britaniya) regionda türklərin möhkəmlənməsini istəmədilər və İranda türklərlə farslar arasında balansın saxlanmasına üstünlük verdilər. Tezliklə sovet qoşunları Təbrizi və bitişik vilayətləri tərk etdilər, bundan sonra şah rejimi Cənubi Azərbaycanda milli hərəkatı qana boyadı. 

Bu gün azərbaycanlılar da milli muxtariyyət yaratmaq istəyirlər. Lakin bizə deyirlər ki, bu, mümkün deyil. Nə üçün şotlandiyalılar, kataloniyalılar, Kvebek fransızları dövlətçilik daşıyıcılarıdır, azərbaycanlılar isə separatçı adlandırılır?

İran hakimiyyəti “Azərbaycan” terminin yada salınmasından qorxur. Odur ki, Azərbaycandan hətta Azərbaycan dilində bədii ədəbiyyat gətirənləri də həbsxanaya salırlar, hələ Azərbaycanın gerbindən, bayrağından danışmırıq.

“Biz Cənubi Azərbaycanın muxtariyyətinin tanınması uğrunda mübarizə aparırıq. Bu, Təbriz, Ərdəbil, Həmədan, Ənzəli, Miyana şəhərləri ətrafında yerləşən və türk əhalisinin üstünlük təşkil etdiyi digər yerlərdir”,- Ə.Tağızadə vurğulayıb. -17D—