C.Həsənli: Qızıma verilən cəza hadisəyə adekvat deyil

(“Turan” Agentliyinin Milli Şuranın sədri professor Cəmil Həsənli ilə müsahibəsi)

Sual: Cəmil müəllim, qızınız Günellə bağlı Yasamal rayon məhkəməsinin qərarından sonra vəziyyət necədir?

Cavab: Məlum olduğu kimi, 2014-cü ilin sentyabr ayının 19-da baş vermiş təsadüfi yol nəqliyyat hadisəsi hüquqi baxımdan araşdırılmadan, işin təfərrüatları haqqında məhkəmə təhqiqatı aparılmadan hakim Akşin Əfəndiyev iki azyaşlı uşaq anası Günel Həsənliyə cəzasını məntəqə tipli cəzaçəkmə müəssisəsində çəkməklə bir il altı ay cəza kəsmişdir. Bu, Günelin törətdiyi yol nəqliyyat hadisəsinə uyğun cəza deyil, Azərbaycanda hər gün yüzlərlə belə hadisələr baş verir. Lakin bu qəddarlığı, bu ədalətsizliyi biz həmin hadisələrin heç birində müşahidə etmirik. Bütün istintaq materiallarını saxtalaşdıraraq, vəkillərin qaldırdığı bütün vəsatətləri rədd edərək, Günel Həsənliyə belə ağır cəza verilməsi onun bilavasitə mənim qızım olması ilə bağlıdır. Bu göstəriş bilavasitə İlham Əliyevdən gəlib və Daxili İşlər Nazirliyi tərəfindən quraşdırılmışdı. Məhkəmə də həmin sifarişi icra edib. Təəssüf ki, Azərbaycanda məhkəmələr İlham Əliyevin əlində öz əleyhdarlarını cəzalandırmaq üçün bir alətə çevrilib. Qızım Günelin başına gələnlər yalnız və yalnız mənim ictimai-siyasi fəaliyyətimlə bağlıdır. Təsəvvür edin ki, bu işdə “zərərçəkən” kimi tanınmış 87 yaşlı Ədilə Səlimova məhkəmə zalına gəlib heç bir zərər çəkmədiyini, heç bir xəsarət almadığını bəyan etsə də, hakim Akşin Əfəndiyev onun bu ifadəsinə hüquqi qiymət vermədi.

Sual: Bildiyimiz qədər Yasamal rayon məhkəməsinin hökmündən apellyasiya şikayəti verilib...

Cavab: Bəli, Bakı Apellyasiya Məhkəməsi işi qəbul edib və ilkin baxış olub. Lakin vəkilin vəsatəti heç bir əsas göstərilmədən rədd edildiyindən bu epizod üzrə Ali Məhkəməyə şikayət verilib. Təsəvvür edin ki, birinci instansiya məhkəməsinin hökmündən ən çox narahat olan və ona etiraz edən bizim istintaq və məhkəmənin “zərərçəkən” kimi tanıdığı Ədilə xanım Səlimova oldu. Hökmün ədalətsizliyi, baş vermiş hadisəyə uyğun olmadığı bu yaşlı qadını da hiddətə gətirdi. O, çox açıq şəkildə mətbuat və televiziya qarşısında bəyan etdi ki, hadisə baş verən zaman bilavasitə polis orqanları onu şikayət ərizəsi yazmağa məcbur edib və əgər bu işdən imtina edərsə onun üçün pis olacağını xatırladıb. Yəni bu qurama cinayət işi bilavasitə Daxili İşlər Nazirliyi, polis orqanları tərəfindən düzülüb qoşulmuşdu.

Sual: Niyə DİN bu işdə maraqlı olub?

Cavab: Mən mətbuata verdiyim müsahibələrimdə və televiziya çıxışlarımda DİN rəhbərliyini, bilavasitə nazir Ramil Usubovu yarıtmaz fəaliiyyətinə görə kəskin tənqid etmişdim. Təsəvvür edin ki, siyasi zəmində həbs edilmiş vətəndaşların, xüsusilə gənclərin evinə və cibinə narkotik atılması əməliyyatları bilavasitə DİN-də hazırlanıb və həyata keçirilib, bu nazirliyin binasında, nazirlə qonşu otaqda Hacı Məmmədovun başçılığı ilə nazirliyin məsul əməkdaşlarından ibarət insan oğurluğu və qətlləri ilə məşğul olan cinayətkar dəstə fəaliyyət göstərib. Nazir televiziya açıqlamasında keçmiş prezident H. Əliyevin göstərişi ilə Bakıda həbsdə olan Abuzər adlı qatı çinayətkarın qaçırılması haqqında özü şəxsən məlumat verib. Mən bu rüsvayçılıqlara münasibət bildirərkən Ramil Usubovu kəskin tənqid etmişdim. Əslində, DİN məni və ailə üzvlərimi çoxdan izləyirdi, yaşadığım evim yanında müşahidə qoyur, evimi nəzarətə götürür, bütün hərəkət traektoriyam izlənilirdi. Günellə bağlı baş vermiş yol nəqliyyat hadisəsini əvvəlcə onlar ayrı məcraya yönəltmək istəyirdilər.

Sual: Hansı məcraya?

Cavab: Əgər xatırlayırsınızsa, DİN mətbuat xidməti 2014-cü ilin oktyabr ayının 2-də bu məsələ ilə bağlı xüsusi açıqlama vermişdi. Orada deyilirdi: “Polis araşdırması zamanı məlum olub ki, bu qəza hüquq-mühafizə orqanlarından sürücü və piyada tərəfindən gizlədilib”. Yəni bilavasitə Milli Şuranın koordinasiya mərkəzinin üzvü Qurban Məmmədovun həbsində istifadə edilmiş hazır ssenarini Günelə münasibətdə tətbiq etmək istəyirdilər. Lakin baş tutmadı. Məlum oldu ki, polis bilavasitə hadisə yerində olub, Günellə birlikdə Ədilə xanımı ixtisaslaşmış Respublika Klinikasına aparıb və klinikada bilavasitə müayinə prosesində iştirak edib. Günel bütün bunları təsdiq edən foto materialları ortaya qoyanda polis yol-nəqliyyat hadisəsinin saxtalaşdırılıb cinayət işinə çevrilməsi istiqamətində əməli fəaliyyətə keçdi.  Bundan sonra hadisənin polisdən gizlətmə ittihamından yayınmaq üçün istintaq orqanları digər saxtakarlıqlara əl atdılar. İstintaq materiallarında göstərilir ki, hadisə barəsində məlumat Yasamal rayon polis idarəsinin 26-cı polis bölməsinin məsul növbətçisi Elşən Yusifovun MK-1175 raportuna əsasən 19.09.2014-cü il tarixdə saat 19:00-da Respublika xəstəxanasından tibb bacısı Süleymanova tərəfindən telefonla verilmişdir. Məsələn, Apellyasiya Məhkəməsinin ilk iclasında vəkil araşdırmaq istəyirdi ki, doğrudan da tibb bacısı tərəfindən belə bir məlumat verilibsə, nə üçün xəstənin müraciətindən 3 saat sonra bu xəstəxananın yerləşdiyi 29-cu polis bölməsinə yox, 26-cı polis bölməsinə verilib. Məhkəmə isə üzdə olan bu saxtakarlığı araşdırmağa həvəs göstərməyərək, vəsatəti rədd edir. Ümumiyyətlə, işin bütün epizodları istintaq tərəfindən saxtalaşdırılıb, bu saxtakarlıqlara söykənərək prokurorluq orqanları saxta ittiham irəli sürüb, məhkəmə isə bütün bunları “qanuniləşdirib”. Amma bütün hallarda Günelə verilən maddənin (263.1) istinad nöqtəsi məhkəmə-tibbi ekspertizanın saxta rəyindən keçir. 

Sual: Bunu hansı yolla edə biliblər?

Cavab: Çox sadə, qanun qarşısında cavabdehlik olmadığından polis, prokurorluq, məhkəmə və onlara bağlı yardımçı təşkilatlar yuxarıdan göstəriş olanda istənilən saxtakarlığa, cinayət xarakterli addımlara gedirlər. Hadisə baş verən gün Mərkəzi Xəstəxanada aparılan müayinə (o cümlədən rentgen müayinəsi) Ədilə xanım Səlimovada xəsarət izləri aşkar etməsə də, ona yalnız yaşı ilə bağlı duzlaşmaya qarşı dərman yazsa da, nədənsə hadisədən 13 və 20 gün sonra iki dəfə keçirilmiş məhkəmə-tibbi ekspertiza 87 yaşlı Səlimovanın “diz oynağının hemartrozunu” müəyyən edib və guya “zərəçəkmişin” səhhətində uzun müddətə pozulma halı baş verib. Niyə “Hemartroza”? Çünki polisdən gizlətmə versiyası ifşa olunandan sonra yol-nəqliyyat hadisəsini 263.1 maddəyə transfer etmək zərurəti yaranmaşdı. Yəni ortada tutarlı bir şey olmadığı halda vətəndaşa saxta ittiham irəli sürülməsi “əsaslandırılmalı” idi.  İstintaq işinə əlavə olunmuş  tibbi rəylərin məzmunundan görünür ki, ekspertin qanunsuz olaraq istinad etdiyi tibbi sənədlərlə onun gəldiyi nəticə arasında açıq ziddiyyət var və bu sənədlərə görə Ədilə Səlimovanın sağlamlığı nəinki uzun, heç qısa müddətə də pozulmayıb. Ədilə xanımın canlı olaraq məhkəmənin hüzurunda heç bir zərər çəkmədiyini, xəsarət almadığını bəyan etməsinə baxmayaraq, məhkəmə bunu müəyyən etməyə maraq göstərməyib. Adi bir məqamı deyim sizə. Məsələn, işdə “zərərçəkmiş” kimi tanınmış Ədilə xanım öz izahatında qeyd edir ki, hadisə baş verən zaman Mirəli Seyidov küçəsindən məscidə gedən yolun sağ tərəfindən sol tərəfinə keçən zaman onu maşın vurmuşdur. Lakin istintaqa bu sərf etmədiyi üçün yol-nəqliyyat hadisəsini saxtalaşdırıb guya piyadanın durduğu yerdə vurulduğu barədə rəy verilmişdir. Niyə? Çünki avtonəqliyyat hadisəsi zamanı piyadaya durduğu yerdə toxunmaqla, hərəkət edən vaxt toxunmağın maddəsi fərqlidir. Yenə məqsəd hadisəni məqsədli şəkildə ağırlaşdırmaq və onu 263.1 maddiyə uyğunlaşdırmaqdan ibarətdir.

Sual: Bir sözlə, polis, prokurorluq və məhkəmə orqanları birləşərək vətəndaş üçün saxta ittiham düzəldiblər.

Cavab: Amma yuxarıların tapşırığı ilə. İlham Əliyevin bilavasitə şəxsi göstərişi və razılığı olmasaydı, yuxarıda adlarını çəkdiyiniz orqanlar belə açıq saxtakarlığa gedə bilməzdilər. Burada açıq bir arxayınçılıq var ki, etdikləri saxtakarlıq əməllərinə “hüquqi” don geyindirdiklərinə görə heç kəs onları cəzalandırmayacaq. İlham Əliyev hakimiyyətə gələndə bütün vətəndaşların haqqını və hüququnu fərq qoymadan qoruyacağına vəd vermişdi. Lakin o, nəinki bu vədi unudub, hətta əksinə olaraq siyasi opponentlərinə qarşı mübarizədə polis, prokurorluq və məhkəmə orqanlarını əlində bir təzyiq alətinə çevirib. -0-