Əli Həsənov Azərbaycan hakimiyyətinin tənqid olunmasını Milli Şuranın uğursuzluğu sayır

Prezident Administrasiyasının ictimai-siyasi şöbəsinin müdiri Əli Həsənov hesab edir ki, Helsinki komissiyasında keçirilən Azərbaycan üzrə dinləmələr sadəcə brifinqdir və onu qiymətləndirməyə dəyməz. Bu barədə o, AzərTac dövlət televiziya agentliyinə müsahibəsində bildirib. 

“Bu tədbirin əhəmiyyətini şişirtmək, onu Konqresdə “dinləmələr” səviyyəsinə yüksəltmək cəhdləri də var ki, mən bunu müəyyən daxili siyasi qrupların özünüreklam cəhdi kimi qiymətləndirirəm. Onlar çox istəyirdilər ki, bu tədbir Konqresdə dinləmələr formatında baş tutsun. Hətta ciddi-cəhdlə bu yaxınlarda Azərbaycana səfər edən, bəhs edilən komissiyaların üzvü olan konqresmen və senatorların tədbirə qatılmalarına nail olmağa çalışırdılar. Lakin heç nə alınmadı. Bu da onların iflası, elə həmin ABŞ-da bu müxalifətə olan səthi münasibətin göstəricisidir”, - o bildirib.

Hakimiyyətin baş ideoloqu Milli Şuranın nümayəndəsi Eldar Namazovun komissiyadakı çıxışını “absurd, əsassız, qeyri-obyektiv və dezinformasiya” adlandırıb. 

“Milli Şura Azərbaycan qanunvericiliyini təhrif edir, ölkədə baş verən hadisələrə, cərəyan edən proseslərə öz subyektiv siyasi maraqları prizmasından yanaşır, subyektiv siyasi iddialarını reallaşdırmağa cəhd göstərirlər və orada təmsil olunan antimilli ünsürlər indi də ermənilərlə sinxron şəkildə Azərbaycanın beynəlxalq nüfuzunu ləkələmək üçün konkret fəaliyyətə başlayıblar. Onlar müxtəlif ölkələrə səfərlər edərək siyasi dəstək, maliyyə mənbələri axtarır, Azərbaycan xalqının rəyi ilə hesablaşmadan onun taleyini xaricdə həll etməyə çalışırlar”, - Ə.Həsənov vurğulayıb.

O, İlham Əliyevin üçüncü dəfə prezidentliyə namizədliyini irəli sürmək hüququnun olmaması barədə iradları absurd adlandırıb. 

“Gəncləri yolundan çıxararaq hüquq pozuntusuna, cinayətə, qeyri-qanuni əməllərə sövq edən belə insanlar sonradan onların həbsindən siyasi şou təşkil edir, müxtəlif beynəlxalq təşkilatlar qarşısında “məsələ” qaldırır və hakimiyyətə qarşı yeni təzyiq elementləri formalaşdırmağa çalışırlar”, - o qeyd edib.

"Transparency İnternational" təşkilatının “2013-cü il Qlobal Korrupsiya Barometri" hesabatında Azərbaycanın korrupsiyaya qarşı mübarizə sahəsində ciddi irəliləyişlər əldə etdiyi bir daha təsdiq olunub. 

Milli Şuranın təmsilçisi isə Helsinki Komissiyasının “dinləmələrində” çıxış edərək Azərbaycana qarşı yeni sanksiyaların tətbiq olunması tələbini irəli sürür. Bu fakt “milli şura”da cəmləşmiş insanların anti-Azərbaycan xislətinin bariz nümunəsidir.

Lakin Azərbaycan müstəqil dövlətdir və ölkə həyatı, sosial, iqtisadi, siyasi, ictimai, mədəni proseslər, seçki kimi ümummilli məsələlər cəmiyyətin daxili tələbatına və xalqın rəyinə uyğun tənzimlənir. Buna görə də seçki prosesi heç vaxt hakimiyyətə iddialı olan, lakin iddiaları ilə real imkanları bir araya sığmayan daxili siyasi qrupların ambisioz planlarına uyğun təşkil oluna və tənzimlənə bilməz”, - o bildirib.

Sonda o, beynəlxalq hüquq-müdafiə təşkilatlarını Azərbaycana qarşı qərəzli münasibətdə və qeyri-obyektivlikdə ittiham edib.

Qeyd edək ki, Əli Həsənov məqsədyönlü şəkildə ABŞ Konqresində keçirilən tədbirin adını açıqlamayın. Tədbir “Problemli   tərəfdaş: Azərbaycanda artmaqda olan avtoritarizm” adlanıb. 

Bundan əlavə, o özünü elə aparıb ki, sanki Helsinki komissiyası nümayəndəsinin Azərbaycanda vəziyyəti tənqid etməsini, ölkənin demokratikləşdirilməsi üzrə real addımların vacibliyi barədə çağırışlarını eşitməyib. O həmçinin rəsmi Bakının ünvanına səslənən ciddi tənqidə məhəl qoymayıb. Və bunun nədən Milli Şuranın uğursuzluğu hesab etməsini düşünmək qalır.-02D-