Fuad Ağayev: Mirqədirovun işi üzrə istintaq görünməmiş pozuntularla keçirilib

Vəkil Fuad Ağayev bazar ertəsi MTN istintaq təcridxanasında müvəkkili jurnalist Rauf Mirqədirova baş çəkib.

Turan-ın müxbiri ilə söhbətində vəkil deyib ki, Mirqədirov ötən həftə həbs müddətinin uzadılması üzrə məhkəmənin necə saxtalaşdırıldığını danışıb.

“Rauf təsdiq edib ki, cümə günü, biz – iki vəkili onunla görüşməyə gəldikdə onu həbs müddətini uzatmaq üçün Nəsimi rayonuna aparıblar.

Bu zaman bizə Mirqədirovun həkimin yanında olduğu barədə yalan söyləyiblər. Yalnız axşam biz vəkillərin iştirakı olmadan qanunsuz proses keçirildiyini və həbs müddətinin uzadılması haqqında əsassız və qanunsuz qərar qəbul edildiyini öyrəndik”, deyə Ağayev bildirib.

Məhkəməyə Emin İsayev sədrlik edib, o, həbs müddətinin noyabrın 19-da başa çatdığına və onun sərbəst buraxılmalı olduğuna məhəl qoymayıb. Buna baxmayaraq, həbs müddəti bitdikdən iki gün sonra həmin hakim həbs müddətini 5 ay uzadıb.

Prosesdə jurnalist vəkillərinin çağırılmasını və ya prosesin təxirə salınmasını tələb edib, lakin buna məhəl qoyulmayıb.

Hakim Mirqədirovun ona verilmiş dövlət vəkilindən imtina etməsinə də məhəl qoymayıb.

Məhkəmənin bu qərarından apellyasiya şikayəti verilib, bundan başqa, vəkillər MTN istintaq təcridxanasının işçilərini yalan danışmaqda ittiham edirlər.

“Belə bir şəraitdə istintaqın obyektivliyi barədə danışmaq və ya bunu gözləmək sadəlövhlük olardı.

Bütün bu aylar ərzində istintaq jurnalistin casusluq fəaliyyəti ilə bağlı heç bir fakt təqdim etməyib.

Jurnalist özü dəfələrlə satqınlıq etmədiyini bildirib və ona qarşı işə xitam verilməsini tələb edir”, deyə vəkil bildirib.

Xatırladaq ki, Rauf Mirqədirov aprelin 19-da Ankarada saxlanılıb və Bakıya deportasiya edilib, burada o, Ermənistanın xeyrinə casusluq ittihamı ilə həbs edilib.

Mirqədirovun Tbilisidə bir restoranda Ermənistanlı hüquq müdafiəçiləri ilə söhbət etməsini əks etdirən videogörüntülərdən başqa, heç bir sübut təqdim edilməyib.

MTN bu görüntüləri “Samvel” adlı birinin təqdim etdiyi təkzibedilməz dəlil kimi qələmə verib. -03В-