Hakimiyyət Elmar Hüseynovun qətlinin üstünün açılmasında maraqlı deyil

Azərbaycan ictimaiyyəti hazırki hakimiyyətdən və hüquq-mühafizə orqanlarından “Monitor” jurnalının redaktoru Elmar Hüseynovun qətlinin motivlərinin araşdırılmasını gözləmir. Bu barədə “obyektiv tv”-yə müsahibəsində bu cinayətin üstünün açılması üzrə Təşəbbüs qrupunun həmtəsisçisi, “Qanun” nəşriyyatının direktoru Şahbaz Xuduoğlu bildirib.

O xatırladıb ki, 2005-ci il martın əvvəllərində Türkiyədən Bakıya gələn istintaq qrupu şübhəli şəxslərin telefon danışıqları əsasında bu cinayəti, faktiki olaraq, açmışdı. Bu zaman Türkiyə müstəntiqlərinin rəhbəri onların funksiyasının yerli istintaqa kömək etmək olduğunu və Azərbaycanlı həmkarlarının istintaqın yekunlarını açıqlayacağına ümid etdiklərini bildirib. Lakin bu, baş verməyib.

Bundan dərhal sonra Milli Təhlükəsizlik Nazirliyi araşdırma prosesini məxfiləşdirdi, ictimaiyyətə isə qətldə Gürcüstan vətəndaşlarının əlinin olması barədə şübhəli versiyalar və onların guya İnterpol vasitəsilə axtarışda olduğu açıqlandı.

Gürcüstan hüquq-mühafizə orqanları bildirib ki, Azərbaycan prokurorluğunun məlumatları şübhəli şəxslərin məsuliyyətə cəlb edilməsi və Bakıya ekstradisiyası üçün əsas vermir.

Xuduoğlunun sözlərinə görə, Elmarı parlament seçkiləri ərəfəsində ictimai-siyasi vəziyyətin sabitliyinin pozulmasında maraqlı olan qüvvələr, yaxud da jurnalistdən tənqidə görə qisas almaq istəyən yüksək vəzifəli şəxslər qətlə yetirə bilərdi. 

Hər iki halda ortada “möhkəm dam” var və buna görə konkret sifarişçini axtarıb tapmaq üçün vaxt lazımdır, deyə o qeyd edib.

Nəticəsi olmayan çox sayda “rezonans” sui-qəsdlər və qətllər sadalamaq olar. Elmar Hüseynovun qətlindən dərhal sonra “Bizim yol” qəzetinin baş redaktoru Bahəddin Həziyev oğurlanıb və az qalsın öldürüləcəkdi, “Azadlıq” qəzetinin müxbirləri Fikrət Hüseynli və Aqil Xəlil döyülüb, aviasiya generalı Rail Rzayev qətlə yetirilib və s.

Bütün bu cinayətlərin arxasında sifariş durur. Cinayətləri araşdırmaq və ictimaiyyətə məlumat vermək yerinə, hakimiyyət növbəti qəsdin baş verməsini gözləyir və bu haqda məlumat əvvəlki cinayətləri “kölgədə buraxır”.

Qanqster başçısı – DİN polkovniki Hacı Məmmədovun işi üzrə məhkəmə prosesi zamanı aydın olub ki, hakimiyyət qurumları və cinayətkar sindikat sıx əlaqəlidir. Lakin iş bu iddialardan uzağa getmədi.

İndi Beynəlxalq Universitetin keçmiş rektoru Elşad Abdullayevin videoçarxları DİN, MTN, Dövlət Mühafizə Xidməti daxilində şaxələnmiş cinayətkar şəbəkə olduğunu açıq-aşkar sübut edir. 

Sən demə, ölkədə heç kim nə özünə, nə də qohumlarına və yaxınlarına psixoloji və fiziki təzyiqdən sığortalanmayıb. Prezident seçkiləri yaxınlaşdıqca bu təzyiqlər artacaq, Xuduoğlu belə hesab edir. -17D-