İndi də Dünya Azərbaycanlıları Assambleyası Rusiyaya xəbərdarlıq edib

Bu ilin mart-aprel aylarında Azərbaycan mətbuatında Rusiya hakimiyyətinin Ümumrusiya Azərbaycanlıları Konqresini bağlamaq niyyəti haqqında narahatlıq doğuran məlumatlar dərc olunurdu. Milli Məclisin deputatı Rasim Musabayev Kreml üçün qəfildən arzuolunmaz olan ÜAK-ın müdafiəsinə qalxdı, Rusiyanı cavab tədbirləri ilə hədələdi, onun ardınca isə Azərbaycanın Rus İcmasının bəyanatında xəbərdarlıq notaları səsləndi.

Amma Azərbaycan diasporasının Rusiyada məşhur olan xadimləri Söyün Sadıqov və Vidadi Abbasov ÜAK-ın sənədlərini vaxtında RF Ədliyyə Nazirliyinə təqdim etməmiş təşkilat rəhbərlərinin əməllərinə görə Konqresin bağlanması ehtimalını aydın şəkildə izah ediblər. Nazirlik yeddi il gözlədi, bu müddət ərzində ÜAK dəfələrlə tələb olunan sənədləri təqdim edə və onlarda göstərilən nöqsanları aradan qaldıra bilərdi. Amma bu, baş verməyib və RF-nin bir çox digər milli təşkilatları kimi, Rusiya qanunvericiliyinə uyğun olaraq ÜAK da fəaliyyətini dayandırmalıdır.

Bazar ertəsi Dünya Azərbaycanlıları Assambleyasının rəhbəri Rəşad Quliyev Azərbaycan KİV-lərinə və təşkilatlarına bəyanat göndərib. Sənəd “ümummilli lider” Heydər Əliyevin və RF prezidenti Vladimir Putinin ÜAK-ın yaradılmasında mühüm rolunun yada salınması ilə başlayır. İlk cümlədəcə Rusiya hakimiyyəti Azərbaycanlıların ictimai təşkilatını bağlamaq niyyətində ittiham olunur. Rusiyanın bu niyyəti Assambleyanın ciddi narahatlığına səbəb olur, belə ki, Azərbaycan və Rusiya arasında dərin və möhkəm, strateji və qarşılıqlı səmərəli münasibətlərə ziddir. Bu münasibətlər inkişaf edib, zəifləməyib, buna görə RF daxilində Azərbaycan-Rusiya dostluğunu gözü götürməyən qüvvələr iki ölkənin arasını vurmağa, Rusiyanı müttəfiqsiz qoymağa çalışırlar, deyə bəyanatda qeyd edilir.

“Hər şey o qədər açıqdır ki, əlavə açıqlamalara ehtiyac belə yoxdur”, Assambleya üzvləri bu şəkildə təəccüblərini bildirir və Moskvaya beynəlxalq hüququ tapdalayan bu qüvvələrin bütün cəhdlərinə qarşı durmağa və Rusiyada milyonlarla azərbaycanlını birləşdirən ÜAK-ı müdafiə etməyə hazır olduqları barədə xəbərdarlıq edirlər. Assambleya Rusiya rəhbərliyini ÜAK qarşısındakı süni maneələri aradan qaldırmağa, bütün problemləri RF qanunları çərçivəsində həll etməyə və münaqişə salınmasında təqsirli olanları cəzalandırmağa çağırıb.

“Turan” Dünya Azərbaycanlıları Assambleyasının lideri, Almaniyanın Köln şəhərində yaşayan Rəşad Quliyevlə əlaqə saxlayıb. O, agentliyin suallarını cavablandırıb.

-  Azərbaycan-Rusiya münasibətlərinin uğurla inkişaf etdiyi bir dövrdə ÜAK-ın bağlanması haqqında məlumatların yayılmasına səbəb nə olub?

- Əlbəttə, burada Rusiyadakı erməni lobbisini iştirakı görünür, ya da münaqişəni Rusiyanın Ədliyyə Nazirliyində işləyən yüksək vəzifəli erməni məmurlar yaradırlar. Onlar Rusiya və Azərbaycan arasında yaranmış dostluq münasibətlərini pozmaq istəyirlər. Göründüyü kimi, Rusiya hökumətində belə qüvvələr var.

- Amma Söyün Sadıqov və Vidadi Abbasov “Turan” agentliyinə müsahibələrində deyiblər ki, yaranmış vəziyyətdə tələb olunan sənədləri RF Ədliyyə Nazirliyinə təqdim etməyə tənbəllik edən laqeyd ÜAK rəhbərliyi təqsirlidir.

-  Mən ona görə Rusiyadakı erməniyönlü qüvvələri təqsirli hesab edirəm ki, təxminən ötən ilin yayında Fizuli Məmmədovun rəhbərlik etdiyi Ümumdünya Azərbaycanlıları İttifaqı və Ümumdünya Azərbaycan Mədəniyyəti Fondu ilə bağlı da belə bir hadisə olmuşdu. Onda da deyirdilər ki, bu təşkilatların sənədlərinin yoxlanılması zamanı nöqsanlar aşkar edilib. Sonradan məlum oldu ki, bu “nöqsanlar” RF Ədliyyə Nazirliyində işləyən Moskvanın erməni əsilli məmurları tərəfindən tapılıb. Onlar bütün sənədləri qaydasında olan Azərbaycan təşkilatlarını susdurmaq istəyirdilər.

- S.Sadıqovun və V.Abbasovun sözləri ilə razı deyilsiniz?

- Mən Sadıqovun və digərlərinin müsahibəsi ilə tanış deyiləm. Amma onlarla razı deyiləm, ona görə ki, hansısa sənəddə nöqsan varsa, onu aradan qaldırmaq olar. Bu səhvi Azərbaycan XİN və RF səfirliyi ilə birlikdə vaxtında aradan qaldırmaq olardı. Ədliyyə Nazirliyi sənədlərdə nöqsanlar olduğu barədə xəbərdarlıq edə bilərdi – dünyanın hər yerində belə olur. Amma nədənsə Ədliyyə Nazirliyi ÜAK sənədlərində hansısa səhvə görə ÜAK-ın işinə xitam verildiyini bildirib. RF Ədliyyə Nazirliyi ətraflı araşdırma aparsa, əminəm ki, Rusiyada hüquq pozuntusuna yol verməyən bir təşkilat belə tapmayacaq. Bu, Rusiyadakı erməni təşkilatlarına da aiddir.

- Təşkilatınız hansı addımları atacaq?

- Bildirmək istəyirəm ki, hər şeyə rəğmən ÜAK-ı bağlasalar, biz kənarda qalmayacağıq və bütün beynəlxalq təşkilatları ayağa qaldıracağıq. “Turan” agentliyinin imkanlarından istifadə edərək, Rusiya hakimiyyətini diqqətli olmağa çağırıram – Azərbaycanın Rusiyadan inciməsi onun hörmətini artırmayacaq.