Mübariz Qurbanlı: Millətçilik Rusiya hakimiyyətinin dayaqlarından biridir

“Cinayətdə milliyyətin araşdırılması düzgün deyil. Orxan Zeynalovun həbsi, onun həbsinin Rusiya televiziyalarında məxsusi göstərilməsi, hadisənin şişirdilməsi, onun Rusiya daxili işlər nazirinin otağına gətirilməsi və bu cür təqdim olunması yol verilən deyil”. Bu barədə Yeni Azərbaycan Partiyasının (YAP) icra katibinin müavini, Orxan Zeynalovun anadan olduğu Şəmkir rayonundan Milli Məclisin deputatı Mübariz Qurbanlı “Amerikanın Səsi”nə müsahibəsində bildirib. 

Onun fikrincə, Rusiya hüquq-mühafizə orqanları Orxan Zeynalovun həbsi, onun təqdim edilməsi zamanı həm Rusiya qanunvericiliyinin, həm də beynəlxalq konvensiyalardan irəli gələn normaları çox kobud şəkildə pozub. “Rusiyada kimlərsə bu hadisəni azərbaycanlılar əleyhinə yönəltməyə cəhd edirlər. Təbii ki, burada ermənilərin barmağı var. Biryulevoda azərbaycanlıların əmlaklarına, dükanlarına edilən hücumlarda ermənilərin də iştirak etməsi barədə faktlar var”, deyə o qeyd edib. 

M.Qurbanlı hesab edir ki, Rusiyada ideoloji böhran yaşanmaqdadır. “Bunun simtomplarını Orxan Zeynalovla bağlı baş verən hadisələrdə də görürük. Rusiyada millətçilik həddindən artıq tüğyan edir. Bu millətçilik Rusiya hakimiyyətinin dayaqlarından biridir. Rusiya millətçilərin tələblərini doğrultmaq, o kəsimin etirazlarının üzərinə su səpmək üçün Orxan Zeynalovun həbsini xüsusi olaraq təqdim etmək, bununla da polisin cinayətkarlara qarşı ardıcıl mübarizə apardığını göstərmək istəyir”. 

Deputatın firkincə, Rusiyanın daxilindəki siyasi-ideoloji böhran, iqtisadi çətinliklər millətçiliyi qızışdırmaqdadır. “Hakimiyyətdəki bəzi qruplar millətçiliyin qızışdırılmasında maraqlıdır. Bu, düzgün yol deyil, olduqca təhlükəlidir. Miqrantlara qarşı təzyiqlər Rusiyanın özünə çox böyük ziyan vura bilər, mənfi fəsadlar verə bilər”. 

O, Rusiyada son günlər baş verənləri bütövlükdə Azərbaycana təzyiq kimi qiymətləndirmir. “Dövlət səviyyəsində Azərbaycana təzyiqdən söhbət gedə bilməz. Bu kriminal hadisəni şouya çevirməkdə məqsəd millətçi kəsimi sakitləşdirmək və hakimiyyətin millətçi kəsiminin tələblərinə tərəfdar olduğunu nümayiş etdirməkdir”.      

M.Qurbanlı hesab edir ki, Azərbaycanın rəsmi şəxsləri hadisə ilə bağlı vaxtında reaksiya verib. “Azərbaycanın Daxili İşlər Nazirliyi, Rusiyadakı səfirliyimiz bununla bağlı açıqlama verib. Biz xaricdə yaşayan Azərbaycan vətəndaşlarının hüquqlarını kifayət qədər yüksək səviyyədə qoruyuruq”. 

Deputat Rusiyada Orxan Zeynalova qarşı baş verənlərinin ictimai təqdimatından narazıdır. “Burada söhbət cinayət əməlinin müdafiəsindən getmir, söhbət bu cinayət hadisəsindən sui-istifadə edib anti-Azərbaycan isterikasının yaradılmasına etirazdan gedir. Mən millət vəkili olaraq Rusiya daxili işlər orqanlarının Orxan Zeynalovun həbsi ilə bağlı səhnəni məxsusi olaraq göstərməsini və bunu insanı alçaldıcı şəkildə etməsini qətiyyətlə pisləyirəm. Bununla əlaqədar öz etirazımı bildirirəm”. 

O, Rusiya daxili işlər nazirinin bu hərəkətini pisləyir. “Bu, mənə orta əsr səviyyəsində bir yanaşmanı xatırladır. Adətən orta əsrlərdə hökmdarın hüzuruna onun düşmənini bu formada gətirib başını qaldırardılar. Sonra hökmdarın hökmü ilə onun başını kəsərdilər. Bu ən azı orta əsr işgəncə metodlarının bir formasının tətbiqinin təkrarıdır. Rusiya daxili işlər naziri belə hərəkət edirsə, o, pisləniləcək. Bu, hamı tərəfindən pisləniləcək və pislənir. Bundan istifadə edib Moskvada yaşayan azərbaycanlıların mülkünə və ya hüququna qəsd edilməsi Rusiyanın özünə ziyan vuracaq. Rusiyanın anti-miqrant siyasəti bu ölkənin iqtisadiyyatına çox ağır zərbələr vura bilər”. 

M.Qurbanlı hesab edir ki, baş verənlər ötüb keçəcək. “Rusiya hökuməti və prezidenti də bunun nəticələrini görəcək. Düşünmürəm ki, oradakı azərbaycanlılar bundan sonra işlərini atıb Azərbaycana qayıdacaq. Çünki belə hadisələr əvvəllər də olub. Bizim Rusiya ilə münasibətlərimiz dost münasibətləridir. Rusiyadakı diaspor təşkilatlarımız çox güclüdür. Hökumətimizin səyləri, dövlətlərarası münasibətlərimiz bu hadisədən sui-istifadəyə imkan verməyəcək”, deyə o qeyd edib. -03B-