Müşahidəçi seçki pozuntularına görə vətəndaşlıqdan imtinaya hazırlaşır

2013-cü ildə Azərbaycan prezident seçkilərində müşahidəçi kimi iştirak edən Şahmurad Məmmədov seçki pozuntuları ilə bağlı müraciətlə çıxış edib.  

Ş.Məmmədov prezident seçkilərində Milli Şuranın namizədi Cəmil Həsənlinin müşahidəçisi kimi 41 saylı Şumqayıt şəhər seçki dairəsinin 15 və 12 saylı seçki mətnətəqlərində müşahidəçi olub. 

Ş.Məmmədov seçkinin saxtakarlıq şəraitində keçdiyini bildirir, məntəqə seçki komissiyası üzvlərinin saxtakarlığını ironiya ilə “seçki şoumenliyi” adlandırır.

Həm də ehtiyatda olan zabit olduğunu bidlirən Ş.Məmmədov bu saxtakarlıqda təəssüf doğuran cəhət kimi saxtakarlığa ziyalı sayılan müəllimlərin qoşulduğunu göstərir. Bu saxtakarlığa DİN daxili qoşunların Sumqayıt şəhərindəki N saylı hərbi hissəsinin hərbi qulluqçuları da cəlb edilib. Səhər saatlarından günortaya kimi bu əsgərlərin bu dairənin üç məntəqəsində müxtəlif geyim formalarında səs vermələrinə diqqət çəkilir. “Kişilərin yerinə qadınlar, qadınların yerinə kişilər, Sumqayıta aidiyyatı olmayanlar, Azərbaycan vətəndaşlığı almayan şəxslər və hamısının yerinə əsgərlər səs verib”, deyə müəllif  qeyd edir.

Ş.Məmmədov 23 saylı orta məktəbdə 16 yaşlı məktəb şagirdləri, onların valideyn və müəllimlərinin İlham Əliyevin xeyrinə hakimiyyətin qəsb edilməsi kimi dövləti cinayətə cəlb olunduqlarını nəzərə çatdırır.  

Bu saxtakarlıqlara cavab olaraq Ş.Məmmədov övladlarını bu məktəbə göndərməyəcəyini, xalq hakimiyyətinin qəsb edilməsində iştirakçı olan şəxslər tutduqları vəzifələrdən istefa verməyənə kimi mübarizəni davam etdirəcəyini qeyd edir. 

Saxta seçkilərin nəticələri ləğv edilməsə, yeni seçkilər təyin olunmasa ailəsi, seçkiləri müşahidə etmiş yoldaşları ilə birgə ölkə vətəndaşlığından imtina edəcəyini bildirir. -05D-