ÜAK-ın «dondurulması»nın səbəbləri təsdiqini tapır

Ramil Quliyev Azərbaycanlıların Federal Milli-Mədəni Muxtariyyətinin (Azərros FMMM) Nijniy Novqorod bölgə təşkilatının Ağsaqqallar Şurasının üzvü Vidadi Abbasovun Contact.az-da dərc olunmuş müsahibəsini “həddindən artıq yersiz və şübhəli” adlandırıb.

Ümumrusiya Azərbaycanlıları Konqresinin (ÜAK) İstrinski təşkilatının sədri və ÜAK Mərkəzi Şurasının üzvü Ramil Əliyev Vesti.az-a müsahibəsində V.Abbasovun bu il aprelin 5-də saytımızda dərc olunmuş müsahibəsi ilə bağlı şərh verib.

Contact.az-ın RF Ədliyyə Nazirliyinin müvafiq qərarı nəticəsində Rusiyada ÜAK-ın fəaliyyətinin dayandırılması ehtimalı haqqında Azərbaycan mətbuatında yayılan məlumatlarla bağlı suallarını cavablandıran V.Abbasov deyib ki, “ÜAK-ın qeydiyyatı problemi bu gün və ya dünən yaranmayıb. ÜAK 2012-ci ildən təkrar qeydiyyatdan keçməyib. O, faktiki olaraq 7 ildir qanunsuz fəaliyyət göstərir. Mən 2012-ci ildə hamı üçün mütləq olan təkrar qeydiyyatdan keçə bilməyən təşkilatlar tanıyıram ki, RF Ədliyyə Nazirliyi onların hamısını hələ 2012-2013- cü illərdə ləğv edib”. Amma ÜAK üçün RF Ədliyyə Nazirliyi istisna edib, yeddi il ərzində bu təşkilatın öz fəaliyyətini RF qanunu əsasında rəsmiləşdirməməsinə göz yumub. Nəhayət, bu il ÜAK qarşısında qəti şəkildə məsələ qoyulub: ya Ədliyyə Nazirliyinin tələblərini yerinə yetirin, ya da işinizi dayandırın.

Ramil Əliyev V.Abbasovun ÜAK rəhbərliyinin işində səhlənkarlıq olduğu haqqında fikrini təsdiq edir, deyir ki, “RF Ədliyyə Nazirliyinin federal orqan olan ÜAK-ın ləğvi haqqında Ali Məhkəməyə müraciəti hər il Hüquqi Şəxslərin Vahid Dövlət Reyestrinə dəyişikliklər edilməsi üçün tələb olunan yenilənmiş məlumatların vaxtlı-vaxtında təqdim edilməməsindən ibarətdir”.

R.Əliyev Vidadi Abbasovun ÜAK-ın ləğvi haqqında bəyanatını yersiz hesab edib: “Bu Nizamnaməyə əsasən, ÜAK-ın Moskva bölgəsinin İstrinski rayon təşkilatı 15 iyul 2015-ci ildə elə həmin RF Ədliyyə Nazirliyində dövlət qeydiyyatından keçib. Belə olan halda sual yaranır, 2012-ci ildə ÜAK ləğv edilmişdisə, mənim rəhbərlik etdiyim təşkilat nəyə əsasən hüquqi qeydiyyatdan keçib?”, deyə R.Əliyev soruşur.

Contact.az-dakı nəşrlə bağlı bəyanat, ən azından, qəribədir. Ona görə qəribədir ki, R.Əliyev bir müddət əvvəl contact.az-a müsahibəsində açıq-aşkar Rusiya məhkəməsi ÜAK-ın mərkəzi aparatının ləğvi haqqında qərar qəbul etsə belə, məhkəmənin bu qərarının ÜAK-ın ayrıca hüquqi şəxslər kimi qeydiyyatdan keçmiş regional təşkilatlarına şamil olunmayacağını qeyd edən Söyün Sadıqovun sözlərinə diqqət yetirməyib.

Bu, o deməkdir ki, ÜAK-ın regional təşkilatının mövcudluğu bütünlükdə ÜAK-ın mövcud olması demək deyil.

Eyni zamanda, contact.az ÜAK-ın taleyinin tezliklə “müsbət istiqamətdə” həll olunmasını, bu təşkilatın Rusiya azərbaycanlılarını öz ətrafında birləşdirməsini və daha səmərəli işləməsini arzulayan R.Əliyevlə həmfikirdir.

Beləliklə, contact.az-dakı nəşrlər “Rusiyada ÜAK probleminin” süni olduğunu üzə çıxardı, onun xilas olması üçün Azərbaycanın rus icması belə ayağa qalxıb, KİV vasitəsilə RF rəhbərliyinə sərt mesaj göndərib. İndi məlum olur ki, Bakıdan Kremlə hansısa “cavab tədbirlərinin görülə biləcəyi” haqqında hədələr gərəksiz idi.

Şişirdilmiş problem Rusiyanın “Kavkazskiy Uzel” nəşrinin səhifələrində işıqlandırılırdı. Bu KİV-in blogeri mülahizə yürüdürdü: “... bu hadisənin, Bakıda artıq yazıldığı kimi, dövlətlər arasında əlaqələrin kəsilməsinə və ya Rusiya-Azərbaycan münasibətlərinin cüzi də olsa nəzərə çarpan pisləşməsinə qədər gedib çıxacağını düşünmürəm. Bu münasibətlər ortaq fundamental və çoxsaylı maraqlara əsaslanır, buna görə belə bir şey olmayacaq. Amma bir anlıq əhvalı bir az poza bilərdi.

Belə etmək lazım deyil. Ciddi iradlar varsa, bildirin, gizlətmədən. Çıxış yolları axtarın, xırda şeylərlə isə məşğul olmaq lazım deyil. Bu, əbəsdir və ölkələr arasında etimadı sarsıdır...”.