Bakıda Bal Sərgi-Satış Yarmarkası davam edir

Bakı/16.10.23/Turan: Azərbaycan Kənd Təsərrüfatı Nazirliyinin və Azərbaycan Arıçılar Assosiasiyasının birgə təşkilatçılığı ilə oktyabrın 2-dən 22-dək arıçılıq məhsullarının 23-cü Respublika Sərgi-Satış Yarmarkası keçirilir.

Yarmarkanın təşkilatçıları bildirib ki, yarmarkada bir arıçı maksimum 400 kiloqram bal və maksimum 30 ədəd arı şanı satışa çıxara bilər.

Satışa çıxarılan balın keyfiyyətinə Azərbaycan Qida Təhlükəsizliyi Agentliyi nəzarət edir.

Arıçılar əvvəlki illərə nisbətən bu il alıcı kütləsinin az olduğunu deyir.

“Bir həftə sonra yarmarka bağlanacaq amma mən hələ gətirdiyim balın yarısının sata bilməmişəm”, satıcı Süleyman Quliyev Turan agentliyinə bildirib.

Digər arıçı Aydın Şirinov deyib ki, bu il yağışlı hava çox olduğundan  əvvəlki illərə nisbətən məhsuldarlıq az olub. 

“Bu il ötən ilə nisbətən az bal süzmüşəm. Həmin balı yarmarkada satmağa gətirdim, amma alıcı demək olar ki, yoxdur. Bu da yəqin kasıbçılıqdandır”, o belə güman edir.-0-