50-yə yaxın qadın liderlik kurslarına qatılıb

Dini Qurumlarla iş üzrə Dövlət Komitəsi (DQDK) bəzi ictimai qurumlarla birgə “Gənc qadınların və qızların liderlik qabiliyyət və biliklərinin artırılmasında dini icmaların rolu” layihəsinə start verib. Bu xəbər Turan-a dini komitədən verilib.

Beş ay davam etməsi nəzərdə tutulan layihə Bakı şəhəri, Lənkəran, Quba, Zaqatala və Şamaxı rayonlarını əhatə edir.

Layihənin rəhbəri Sevinc İsgəndərova layihə çərçivəsində ilk görüşün aprelin 12-də Şamaxı rayonunda, ictimai sektorda çalışan, dini icma üzvü və evdar olan 50-yə yaxın xanımın iştirakı ilə keçirilib. Təlimdə qadınların ictimai sektorda iştiraklarının vacibliyi ilə birgə, hüquqların, xüsusilə, həssas problem olan erkən nikah məsələsində hüquqların qorunması haqda dinləmələr keçirilib. Təlimə qatılanlar qadınların söz azadlığına malik  olmamasını, qızların erkən ərə verilməsini, məişət zorakılığına məruz qalmasını regionlarda “yaşayan problemlər” adlandırıblar. 

Bu problemlərin aradan qaldırılması üçün “Aktiv Qadınların Əməkdaşlıq Şəbəkəsi”nin yaranmasına dəstək verilməsi vacib sayılıb. Bundan əlavə, qadınların hüquqlarını bilmələri baxımından maarifçi tədbirlərin keçirilməsinə ehtiyac odluğu qeyd edilib.   

Layihəyə Ağsu, Göyçay, İsmayıllı və Ağdaş rayonundan olan xanımlar da qatılıblar. -05D-