Abortlar yoxsulluq və turizm göstəricisi kimi

2016-cı ildə Azərbaycanda 159,5 min uşaq dünyaya gəlib və 34,6 min abort olunub. Yəni orta hesabla 100 uğurlu doğuşa 21-dən çox abort düşüb. Həm də Dövlət Statistika Komitəsinin hesabatında yer alan məlumata görə, abort qərarı verən 20,3 min qadın 15-29 yaşlarında olub.

Ötən il 15-17 yaşında 19 qadın şüurlu şəkildə dünyaya gəlməmiş övladını öldürməyə qərar verib. 2015-ci ildə bu göstərici dəhşətli olub - 15-17 yaşlarında 50 qadın.

2014-cü ildə Azərbaycanda 27 220 abort olunub, bu da hər 100 doğulan uşağa 15,9 abort düşməsi deməkdir.

2013-cü ildə ölkədə 27 min abort olub.

Ölkədə abortların sayı artır, bunun əsas səbəblərindən biri övladlarını böyüdə bilməyəcəklərini dərk edən qadınların maddi yoxsulluğudur. Bəziləri dəhşətli addımlar atır: bu günlərdə Şəmkirdə qadın qucağında iki azyaşlı oğlu ilə özünü qatarın altına atıb. Hamısı həlak olublar.

İkinci problem qız uşağının dünyaya gəlməsinin qarşısını almaq məqsədilə edilən abortlardır. Dünyada selektiv abortların sayına görə "bütün planetin önündə" Çin gedir. Azərbaycan ilk beşlikdə Hindistan, Gürcüstan, Ermənistanla qonşudur. Dünyaya gəlməmiş qızların qəsdən öldürülməsi cəmiyyətin geridəqalmış olmasının əlamətidir - belə cəmiyyətlərdə yeni ailə quranların yeddi oğul, bir qız istəyi və ya Azərbaycanda yayılmış "əsl kişinin oğlu olar" ifadəsi normal hesab olunur.

Azərbaycanda selektiv abortlara qarşı mübarizə üçün qanunvericilikdə tibbi səbəb olmadığı təqdirdə dölün cinsiyyətinin müəyyən edilməsi qadağan olunub. 2017-ci ilin martında isə Milli Məclis Cinayət Məcəlləsinə qanunsuz abortları qadağan edən dəyişiklik edib. Xüsusi ali tibbi təhsili olmayan şəxsin həyata keçirdiyi aborta görə cərimə məbləği (1 min manatdan 1,5 min manata) artırılıb.

Abortların sayının artmasının üçüncü səbəbini "Təmiz Dünya" İctimai Birliyinin sədri Mehriban Zeynalova səsləndirib. O bildirib ki, Dövlət Statistika Komitəsinin açıqladığı rəqəmlər yalnız rəsmi olaraq qeydiyyata alınmış abortları əks etdirir. "UNİCEF-in hesabatında qeyd edilirdi ki, Azərbaycanda 5000 erkən nikah hadisəsi qeydə alınıb. Bu nikahlarda abortlar ayrıca olaraq araşdırılmalıdır. Bundan başqa, zorlanmadan sonra abort xahişi ilə müraciət edirlər. İntim xidmətlər göstərən gənc qızlar ayrı kateqoriyaya daxildir. Bizdə onların çox vaxt hamiləliyi süni olaraq sonlandırmaq məqsədilə həkimlərə müraciət etdiklərini göstərən kifayət qədər fakt var", deyə M.Zeynalova bildirib.

Azərbaycanın mədəniyyət və turizm naziri bildirib ki, 2017-ci ildə ölkədə turizm 25% artıb, KİV-də isə ərəb kişilər üçün Azərbaycanda yüksək vəzifəli Azərbaycan məmurlarının məqsədyönlü şəkildə təşkil etdikləri seksual turizmin məşhur olması haqqında məqalələr dərc edilir. Onlar üçün bu, xüsusi gəlir mənbəyidir. Bu, o deməkdir ki, bu il abortların sayı ötən ilki "nailiyyətdən" yüksək ola bilər.

Azərbaycanda abortlara 23 noyabr 1955-ci ildən, SSRİ dövründən icazə verilib. Hazırda Azərbaycan qanunvericiliyi ilk 28 həftədə hamilə qadının tələbi ilə abort etməyə icazə verir. İlk 28 həftə başa çatdıqdan sonra hamiləlik yalnız ciddi tibbi və ya sosial səbəblərdən sonlandırıla bilər. Tibbi səbəblərə görə hamiləliyin istənilən dövründə abort edilə bilər.