Abşeron çimərliklərinin ələ keçirilməsi dövlət məmurlarının işidir

Hüquqşünas Aslan İsmayılov “Amerikanın Səsi” radiosuna və Turan agentliyinə müsahibəsində Abşeron çimərliklərinin oliqarxlar və dövlət məmurları tərəfindən ələ keçirilməsi məsələsinə toxunub.

Onun sözlərinə görə, Xəzərin bütün sahili “ələ keçirilib”, boş yer, demək olar ki, qalmayıb.

Deputat Zeynəb Xanlarovanın ötən ilki çağırışına qulaq verən olmayıb və heç kim onu dəstəkləməyib. Qalib Salamzadə, Elmira Axundova kimi deputatlar məmurları, öz yaxın ətrafını müdafiə ediblər.

Bu gün Xəzər sahillərində aztəminatlı təbəqələrin nümayəndələrinin gedə biləcəyi pulsuz çimərlik qalmayıb.

“Mənim yanıma Pirşağı qəsəbəsindən bu məsələ ilə bağlı bir nəfər gəlmişdi. Onun dediklərindən və mənim də müşahidə etdiklərimdən bir şey gördüm. Bu dəqiqə o qədər dəniz kənarını bağlayıblar ki, haradasa 20-30 metrlik bir cığır qoyublar. İnsanlar oraya çimmək üçün getmir, ayaq üstə durmaq üçün dəniz kənarına gedirlər”.

İsmayılov xatırladıb ki, Heydər Əliyev hələ 2003-cü ildə dənizin 130 metrlik məsafəsində tikinti aparılmasını qadağan edən sərəncam imzalamışdı.

Amma 2008-ci ildə artıq məsafəni 20-25 metrə qədər azaldan yeni sərəncam verildi.

Eyni zamanda, sərəncamda dənizə çıxışın məhdudlaşdırılmasının yolverilməz olduğu qeyd edilirdi. İnzibati Xətalar Məcəlləsində də buna bənzər qadağa var. Bəs niyə bu, baş verir?

İsmayılov hesab edir ki, bunda 7-8 məmurdan ibarət qrup təqsirkardır. Bütün bu oliqarxlar orada balıqçılıqla məşğul ola yerli sakinlərin Şıxov qəsəbəsi ərazisindən “sıxışdırıb çıxarmağa” müvəffəq olublar. Onların əlindən hər şeyi alıblar. Bunun əsasında acgözlük durur.

İsmayılovun sözlərinə görə, onun hazırladığı videoda deputatların, nazirlərin, Prezident Administrasiyası əməkdaşlarının, konsern rəhbərlərinin və s. bağları əksini tapıb. 10 ha çimərlik ərazisinin ələ keçirildiyi hallar var.

Konstitusiyanın 37-ci maddəsi vətəndaşların istirahət hüququna zəmanət verir. Amma Azərbaycan xalqının bu hüququ da əlindən alınıb, İsmayılov belə hesab edir. -03В-