Rəsul Cəfərov hakimiyyətlə barışığa inanır

Həbsdə olan hüquq müdafiəçisi Rəsul Cəfərov Kürdəxanı İstintaq Təcridxanasından Dərnəgül qəsəbəsindəki 10 saylı cəzaçəkmə müəssisəsinə köçürülüb. O, öz vəkili vasitəsilə Turan-ın həbsinin bir ili ilə bağlı suallarını cavablandırıb.

Cəfərov ötən ili itirilmiş hesab edir. Bütün bu müddət ərzinə o, hakimiyyəti bütün fəaliyyətinin barışıq xarakterli olduğuna inandırmağa çalışıb.

“Həbsimdən əvvəl, həbs dövrü və ondan sonra da müstəqil hüquq müdafiəçilərinə məxsus olan prinsiplərə əməl etmişəm və bundan sonra da edəcəyəm”, deyə o bildirib.

Hələ ibtidai istintaq zamanı, 15 oktyabr 2014-cü il tarixində o, ölkə prezidentinə müraciət edib. Bu yaxınlarda o, dövlət büdcəsinə vergi borcunu ödəyib.

Cəfərov ümid edir ki, onun uzatdığı əl havada qalmayacaq.

“İnanmaq istəyirəm ki, müraciətlərimə cavab veriləcək və mən azadlığa çıxacağam”, deyə Cəfərov bildirib.

Həbsdə vaxtı necə keçirdiyi haqqında suala cavabda Cəfərov saxlanma şəraitindən və ona qarşı davranışdan şikayət etməyib.

O, bir ili İstintaq Təcridxanasında keçirib, rəhbərliklə də, işçi heyətlə də yaxşı münasibətləri olub.

Hər rübdə bir ombudsman və Beynəlxalq Qırmızı Xaç Komitəsinin əməkdaşları ona baş çəkiblər. İstintaq Təcridxanasının həkimləri də müntəzəm olaraq onun səhhəti ilə maraqlanıblar.

Fiziki və psixoloji nöqteyi-nəzərdən də Cəfərov özünü normal hiss edir.

İstintaq Təcridxanasında o, çox oxuyub, radio dinləyib, xəbərlərə və futbol maçlarına baxıb.

“Yerli və beynəlxalq ictimaiyyət mənim müdafiəm üçün əlindən gələni edib. Apellyasiya Məhkəməsində sonuncu prosesdə əvvəlki iclaslarda olmayan yeni insanlar gördüm və bu, xoş idi”, deyə Cəfərov qeyd edib.

Cəfərov 2 avqust 2014-cü il tarixində qanunsuz sahibkarlıq, vergi ödnişindən yayınma və səlahiyyətlərindən sui-istifadə ittihamı ilə həbs edilib.

16 aprel 2015-ci il tarixində o, 6,5 il müddətinə azadlıqdan məhrum edilib.

İyulun 31-də Bakı Apellyasiya Məhkəməsi cəza müddətini üç ay qısaldıb.

Amnesty International Cəfərovu “vicdan məhbusu” hesab edir.

Beynəlxalq təşkilatlar, o cümlədən Avropa Şurası, Avropa İttifaqı və s. çoxsaylı bəyanatlarında Azərbaycan hakimiyyətini Cəfərovu və uydurma ittihamlarla həbs edilmiş digər hüquq müdafiəçilərini azad etməyə çağırıb. -06B-