Bank Technique bağlanması haqqında məlumatları təkzib edir

“Bank Technique” bəyanat yayaraq, bağlanması və hesablarında olan vəsaitlərin itirilməsi haqqında KİV-də yayılan məlumatları təkzib edib.

“Bu cür şaiyələr bank rəhbərliyinin və müştərilərinin narahatlığına səbəb olur. Müəyyən çətinliklər var və bütün resurslar onların həllinə yönəlib: xərclər optimallaşdırılır, restrukturizasiya aparılır və digər tədbirlər həyata keçirilir”, deyə bankın məlumatında bildirilir.

Son üç ildə bankın ümumi kapitalı xeyl artıb, bu dövr ərzində 310 mln. manat gecikmiş kreditin 157 mln. manatı qaytarılıb, deyə məlumatda qeyd edilir.

“Bankdakı hesablarda olan vəsaitlərin itirilməsi təhlükəsi yoxdur. Bu, bütün müştərilərimizə də aiddir”, deyə məlumatda bildirilir.

* Bank Technique ASC 1994-cü ildə “Texnika bank” adı ilə yaradılıb və ölkənin aparıcı bankları onluğuna daxildir.

Son günlər KİV-də bankın iflas etdiyi, əməkdaşların işdən çıxarıldığı və müştərilərin hesablarındakı pulu götürmək imkanı olmadığı haqqında bir çox məqalə yayılıb. -02D-