Abşeron məhkəməsi polisin N.Yaqublu barədə həbs qərarını qüvvədə saxladı

Abşeron məhkəməsi Abşeron polis idarəsinin gənc müsavatçı Nigar Yaqublu barəsində seçdiyi həbs qətimkan tədbirinin dəyişdirilməsi barədə müdafiə tərəfin müraciətini rədd edib. Bu haqda “Turan”a hadisə yerində olan hüquq müdafiəçisi Novella Cəfəroğlu bildirib.

N.Yaqublu bu il avqust ayının 25-də Müsavat Partiyasının üzvü Aydın Acalovun ölümü ilə nəticələnən yol-nəqliyyat qəzasında təqsirli bilinir. Abşeron rayon polis idarəsi sentyabrın 11-də onun barəsində iki aylıq həbs qətimkan qərarı verib. Öz-özlüyündə bu qərarı Nigarın istintaqdan yayına bilməsi ilə motivləşdirib. Mərhum A.Acalovun oğlu və bacısı onun ölümündə Nigarı günahkar bilməsələr də, bu, müstəntiqə N.Yaqublu barəsində həbs qərarı çıxarmağa mane olmayıb.

N.Yaqublunun valideynləri və vəkilləri istintaqın gedişindən deyil, onun obyektiv getməməsindən narahatlıq ifadə ediblər. N.Yaqublu barəsində seçilən həbs qətimkan tədbiri əsassız sayılıb.

Bundan sonra müdafiə tərəfi müstəntiqin seçdiyi qərarın ləğv olunması və ya ev dustaqlığı ilə əvəz edilməsi üçün Abşeron rayon məhkəməsinə müraciət ünvanlayıb. Məhkəmə bir dəfə təxirə salınıb. Bu gün keçirilən prosesdə hakim müstəntiqin seçdiyi qətimkan tədbirini qüvvədə saxlayıb. Müdafiə tərəfi hakimin qərarından Sumqayıt apellyasiya məhkəməsinə şikayət verməyə hazırlaşır.  

Bu məsələ ilə bağlı bu günlərdə keçirilən mətbuat konfransında Nigarın vəkili Adil İsmayılov bu həbsin mili mentalitetə zidd, belə yol-nəqliyyat qəzalarında nadir rast gəlinən fakt olduğunu söyləyib. Həm də N.Yaqublu barəsində həbs qərarı dəyişmədiyi halda bunun həm də siyasi sifariş kimi anlaşılacağı bəyanatı səsləndirib. -05B-