ADNSU maddi çətinlik yaşayan tələbələrə güzəşt edir

"Turan" İnformasiya Agentliyində 24 noyabr 2017-ci il tarixində dərc olunmuş "Pulun yoxdur, oxuma!" adlı məqalədə respublikanın ali məktəblərində ödənişli əsaslar üzrə təhsil alan tələbələrin problemlərini qaldırdığınız üçün təşəkkür edirik. Bununla yanaşı, məqalədə Azərbaycan Dövlət Neft və Sənaye Universiteti (ADNSU) ilə bağlı qeyd olunmuş bəzi məqamlara aydınlıq gətirməyi vacib sayırıq. ADNSU-da hazırda bakalavr və magistratura səviyyələrində 10700-dək tələbə təhsil alır ki, onlardan 38%-i ödənişli əsaslarla oxuyur. 62% tələbə dövlət sifarişi ilə təhsil alır və onların təhsil haqqını dövlət ödəyir.

`ADNSU-da təhsil haqqı ixtisasdan asılı olaraq qiyabi şöbədə 1100-1500, əyani şöbədə isə 1200-1900 manat arasında dəyişir. Ödənişli əsaslarla təhsil alan tələbələrin hər biri ilə ADNSU arasında müqavilə imzalanır. Hər iki tərəfin öhdəlik və vəzifələrinin qeyd olunduğu müqavilənin şərtlərinə əsasən ödənişli əsaslarla oxuyan tələbələr üçün təhsil haqqı ilə bağlı münasib ödəniş qrafiki tərtib olunub. Tələbələr oktyabrın 1-dək I yarımil, martın 1-dək isə II yarımil üçün təhsil haqqını ödəməlidirlər.

ADNSU-da ödənişli əsaslarla təhsil alan şəhid, qaçqın və məcburi köçkün ailələrindən olan, eləcə də hər iki valideynini itirmiş 467 tələbə vardır ki, onların təhsil haqqını dövlət ödəyir.

Hazırda ödənişli əsaslarla təhsil alan tələbələrdən yalnız 8-10%-i təhsil haqqını ödəməyib. 2017/2018-ci təhsil ilinin II yarımili üçün ödəniş edən tələbələrin sayı isə 1%-i keçmir.

Məqalədə təhsil haqqını ödəməyən tələbələrin dərsə buraxılmaması, onların guya auditoriyadan çıxarılması ilə bağlı yazılanlar, eləcə də rektorla görüşə bilməməsi haqqında yazılanlar həqiqəti əks etdirmir. Təhsil haqqını ödəyə bilməyən tələbələrə rektorun adına ərizə ilə müraciət edib möhlət almaq təklif olunur və tələbənin istəyi 100% təmin olunur. Ötən ilki təcrübədən çıxış edərək qeyd edə bilərik ki, möhlət hüququ alan tələbələra hətta I yarımilin imtahanlarına belə buraxılıb, bəzi hallarda II semestrin getdiyi vaxtda belə I yarımil üçün təhsil haqqı ödəməmiş tələbələr olub. ADNSU 2017/2018-ci tədris ilində də bu ənənəni davam etdirir və hər bir tələbəyə fərdi qaydada yanaşaraq onların vəziyyətini anlamağa və tələbələrin müraciətlərini nəzərə almağa hazırdır.

Lakin bəzi hallarda tələbələrə rast gəlinir ki, onlar təhsil haqqını ödəmək üçün onlara möhlət hüququ verilməsinə dair rektorun adını ərizə yazmaqdan boyun qaçırırlar. Belə tələbələr bu addımı təhsil haqqını nə vaxt ödəyə biləcəkləri ilə bağlı konkret fikir söyləməyə çətinlik çəkmələri ilə izah edirlər. Universitet rəhbərliyi bir daha təhsil haqqının ödənilməsi ilə bağlı problemləri olan tələbələrin onlara möhlət hüququnun verilməsi ilə bağlı rektora yazılı ərizə ilə müraciət etməyə səsləyir.

Rektorun qəbuluna düşmənin guya müşküllüyü barədə fikirlərə gəlincə, hər həftənin çərşənbə axşamı saat 16:00-da istənilən şəxs, istər tələbə, istərsə müəllim, istərsə də adi vətəndaş ADNSU-ya rektorla görüşdə iştirak onu narahat edən problem və ya sualla bağlı müraciət edə bilər. Bundan əlavə, ADNSU-nun akt zalında ayda bir dəfə açıq mikrofon adlı tədbir keçirilir. Tələbələr və onların valideynləri həmin tədbirdə iştirak edərək öz suallarını rektoa ünvanlaya bilər. Açıq mikrofon tədbirində iştirak üçün KİV nümayəndələri də müraciət edə bilər. Növbəti Açıq mikrofon tədbiri dekabrın 9-da ADNSU-nun əsas korpusunda akt zalında keçiriləcəkdir.

Azərbaycanın ən qocaman ali təhsil müəssisələrindən biri olan ADNSU üçün hər bir tələbə Azərbaycan xalqının övladıdır. ADNSU tələbələrə yüksək bilik verib onların gələcəkdə xalqımız və dövlətimiz üçün layiqli vətəndaş və peşəkar mütəxəssis kimi yetişdirilməsini özünün əsas missiyası sayır. Lakin istənilən bir sahədə olduğu kimi, hər hansı məhsul və ya xidmət müqabilində, bizim halda təhsil verilməsi müqabilində ödəniş olunmalıdır. ADNSU tələbələrin istək və imkanlarını nəzərə alaraq təhsil haqqının hissə-hissə ödənilməsinə şərait yaradır. Onu da qeyd edək ki, tələbənin dövlət sifarişi və ya ödənişli əsaslarla təhsil almasından asılı olmayaraq Azərbaycan dövləti onların tələbə təqaüdü alması üçün ədalətli mexanizm tətbiq edir və ADNSU-da ödənişli əsaslarla təhsil alan və tədrisdə göstərdikləri nailiyyələrə əsasən təqaüd alan yüzlərlə tələbə vardır.

Sonda bir daha vurğulamaq istərdik ki, əgər hər hansı bir tələbənin təhsil haqqı ilə bağlı problemi yaranıbsa rektorun adına ərizə ilə müraciət etməsi lazımdır. Belə müraciətlər məsələnin maksimal dərəcədə - 100% tələbənin xeyrinə olaraq həllinə şərait yaradır".