Aleksandr Lapşinin işi üzrə prosesdə iki şahid çıxış edib

Bakı/03.07.17/Turan: Bazar ertəsi bloger Aleksandr Lapşinin işi üzrə məhkəmə prosesində iki şahidin ifadəsi dinlənilib. Şuşadan məcburi köçkün Eyyub Əbdüləzimov deyib ki, Lapşini KİV-də yayılan məlumatlardan tanıyır.

Onun sözlərinə görə, erməni təcavüzü nəticəsində öz doğma yurdunu tərk etməli olub. Dağlıq Qarabağa gələn Lapşin oranı "müstəqil erməni dövləti" kimi təqdim etmək istəyib və separatçıları dəstəkləyib.

O, məhkəmədən xahiş edib ki, Lapşinə layiq olduğu cəzanı versin.

Digər şahid, Şuşadan məcburi köçkün Fəxrəddin Səfərov deyib ki, Lapşin azərbaycanlıların zorla çıxarıldığı Dağlıq Qarabağa getməklə azərbaycanlıların heysiyyatını təhqir edib.

Şahid deyib ki, Lapşinin Azərbaycan əleyhinə çıxışları barədə mətbuatdan bilir.

"Lapşin işğalçıları, təcavüzkarları müdafiə etməklə bizim hüquqlarımızı pozub. O, öz əməlinin cəzasını çəkməlidir", - F.Səfərov vurğulayıb.

Sonra hakim Əlövsət Abbasov daha üç şahidin qaldığını elan edib.

Bundan əlavə, Lapşinin anasının ifadəsi qalır. Ancaq Azərbaycan qanunlarına görə, şahidin öz yaxın qohumlarının əleyhinə ifadə verməmək hüququ var.

Öz növbəsində vəkil Eduard Çernin Turan-ın müxbirilə söhbətində deyib ki, Lapşinin anası məhkəmədə çıxış etmək istəmir. O, Bakıya oğlunu görməyə gələcək.

Növbəti məhkəmə iclası iyulun 6-na təyin edilib.

İttihamnaməyə görə, Lapşin 2011-2016-cı illərdə dəfələrlə Azərbaycanın işğal edilmiş ərazilərində olub. Buna görə Azərbaycan XİN-in "qara siyahı"sına daxil edilib. Ancaq 2915-ci ildə Azərbaycana Ukrayna pasportu ilə gəlib. O, Azərbaycanın sorğusu ilə Belarusda saxlanılıb və Bakıya verilib.

İrəli sürülən ittihamlara əsasən Lapşini 8 ilədək həbs cəzası gözləyir.

Rusiya və İsrail hakimiyyətləri Azərbaycan hakimiyyətindən blogerin azadlığa buraxılmasını xahiş etsələr də bu, nəticə verməyib.-06C--