Alkoqolun kartla satışı ləğv edilib, hakimiyyət etirazlardan qorxaraq, boyun əyir

Yanvarın 12-də Azərbaycan hakimiyyəti alkoqolun plastik kartlarla satılması haqqında öz 1 yanvar tarixli qərarını ləğv edib. Bu barədə dövlət televiziyasına müsahibəsində vergilər nazirinin müavini Sahib Ələkbərov bildirib.

Onun sözlərinə görə, siqaretin nağd pulla topdan satışına qoyulmuş məhdudiyyət də qaldırılıb.

“Bizə, Nazirlər Kabinetinə və Prezident Administrasiyasına bəzi məsələlərin həlli üçün çoxsaylı müraciətlər daxil olub. Bütün bunları nəzərə alaraq, cənab prezident sahibkarların qayğısına qalıb və yeni ticarət qaydalarının tətbiqini təxirə salmaq tapşırığı verib”, deyə nazir müavini bildirib.

Xatırladaq ki, yeni qaydalara əsasən, alkoqol satışının və siqaretin topdan satışının yalnız plastik kartlar vasitəsilə həyata keçirilməsi nəzərdə tutulurdu. Lakin 10 gün sonra hakimiyyət bu ticarəti heç cür təşkil edə bilməyib. Nəticədə, alkoqol ticarət şəbəkəsindən yoxa çıxıb.

Elə bu gün hakimiyyət bildirib ki, Lənkəranda etirazlara səbəb məhz alkoqolun olmaması olub. Amma bu dəlil tənqidə belə layiq deyil, çünki etirazçılardan heç kim alkoqolu piştaxtalara qaytarmağı tələb etməyib. Göründüyü kimi, hakimiyyət etirazların güclənməsini gecikdirmək və uğursuz iqtisadi siyasətdən irəli gələn sosial partlayışa yol verməmək üçün həyəcanla tədbirlər görür. -16D-