Antiinhisar xidməti sertifikatlaşdırılmış maskalar almağa çağırır

Bakı/25.12.20/Turan: İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti əhalini sertifikatlaşdırılmış maskalardan istifadə etməyə çağırıb.

İdarənin məlumatında deyilir ki, koronavirus pandemiyasına qarşı mübarizədə qoruyucu maskaların doğru seçilməsi vacibdir.

Azərbaycanda tibbi maskalara dair əsas tələbləri müəyyən edən iki dövlət standartı (AZS 884:2020 (EN 14683:2014) və AZS 885:2020 (149:2001+А1:2009)) qəbul edib və ölkədə satışa çıxarılan (yerli istehsal və idxal olunan) bütün növ maskalar bu standartların tələblərinə uyğun olmalıdır.

Standartların tələblərinə görə tibbi maskaların əsas xususiyyətləri onun bakterial filtrasiya effektivliyi, maskanın hava keçiriciliyi və mikrobioloji təmizliyidir.

Dövlət Xidməti istehlakçılara qoruyucu maska alarkən satıcıdan maskaların mənşəyi haqqında məlumat və onların təhlükəsizliyini təsdiq edən sertifikatları tələb etməyi tövsiyə edir. Satışda sertifikatlaşdırılmamış naməlum mənşəli qoruyucu maskaların satıldığını aşkar etdikdə istehlakçılar Dövlət Xidmətinə müraciət edə bilərlər.

Tələblərə cavab verməyən malların satışını həyata keçirən sahibkarlıq subyektləri məsuliyyət daşıyır. Bu pozuntulara görə vəzifəli şəxslərə qarşı 1500 manatdan 2000 manatadək, hüquqi şəxslərə isə 4000 manatdan 6000 manatadək cərimə tətbiq olunur. -06D-