AOK prezidenti azərbaycanlı jurnalistlərin həbsdən azad edilməsinə yardım göstərməyə çağırılır

Human Rights Watch beynəlxalq hüquq-müdafiə təşkilatının və Jurnalistləri Müdafiə Komitəsinin (JMK) nümayəndələi aprelin 30-da Avropa Olimpiya Komitəsinin (AOK) prezidenti Patrik Hikki ilə görüşüblər. Görüş Dublində İrlandiya Olimpiya Şurasının ofisində keçirilib.

JMK-nın məlumatına görə, görüş zamanı Azərbaycanda insan hüquqlarının və mətbuat azadlığının ağır durumu müzakirə edilib. Qeyd olunub ki, ilk Avropa Oyunlarının keçiriləcəyi ölkə ən çox senzuranın tətbiq olunduğu, jurnalist və blogerlərin həbs edildiyi 10 ölkə arasındadır.

P.Hikkiyə təqdim olunan məktubda o, Azərbaycan hökumətilə bu məsələləri müzakirə etməyə, həmçinin Avropa Oyunlarını, siyasi, iqtisadi, sosial mövzuları və insan hüquqlarını işıqlandıran jurnalistlərə şəraitin yaradılmasını tələb etməyə  çağırılıb.

“Belə reportajlar Avropa Xartiyasının əsas prinsiplərinə uyğundur”, - məktubda qeyd olunur.

Həmçinin məktubda həbsdə olna jurnalistlərin dərhal azad edilməsinə, jurnalistlərin hüquqlarını müdafiə edən Emin Hüseynova qarşı təqiblərə son qoyulmasına, media  və ifadə azadlığını məhdudlaşdıran bütün qanunların ləğvinə çağırılır.

Bütün bunlar iyunun 12-dək - Avropa Oyunlarının açılış mərasiminə kimi həyata keçirilməlidir”, - JMK-nın proqram koordinatoru Nina Oqniyanova bildirib.

“Cənab Hikki, insan hüquqlarının vəziyyətinin yaxşılaşdırılması üçün Azərbaycan hökumətinə təsir etməkdən ötrü unikal imkanlarınız var”, - məktubda qeyd olunur.–06D-