![Apellyasiya Məhkəməsi Polad Aslanovu həbsdə saxlayıb](https://turan.az/resized/750/500/resize/media/2019/main/101400022349.jpg)
Apellyasiya Məhkəməsi Polad Aslanovu həbsdə saxlayıb
Bakı/14.10.19/Turan: Oktyabrın 14-də Bakı Apellyasiya Məhkəməsi xeberman.com saytının redaktoru Polad Aslanovun həbs müddətinin uzadılması barədə şikayətini təmin etməyib. Bu barədə Turan-a jurnalistin həyat yoldaşı Gülmirə Aslanova bildirib.
Onun sözlərinə görə, müdafiə tərəfi həbs qətimkan tədbirinin dəyişdirilməsi və P.Aslanovun həbsdən azad edilməsi üçün yeni addımlar atmalıdır.
G.Aslanova bildirib ki, həyat yoldaşı həbs müddətinin uzadıldığı gündən - oktyabrın 5-dən bu qərara və ümumilikdə cinayət təqibinə etiraz olaraq aclıq edib.
O, səhhətinin kəskin pisləşməsi, qan təzyiqinin enməsilə əlaqədar oktyabrın 10-da aclığı dayandırıb.
"Polad ürək-damar xəstəliyindən əziyyət çəkir. Aclıqdan sonra səhhəti daha da zəifləyib", - G.Aslanova bildirib. O qeyd edib ki, həyat yoldaşı özünü günahkar saymır.
Vəkil Osman Kazımov məhkəmə iclasından sonra jurnalistlərə bildirib ki, istintaq P.Aslanovun həbsdə saxlanması və istintaqın uzadılması üçün əsaslı dəlillər təqdim etməyib.
"Aslanov özünü günahkar saymır", - vəkil bildirib. O belə qənaətə gəlir ki, P.Aslanov peşə fəaliyyətinin qurbanı olub.
Xatırladaq ki, xeberman.com saytının redaktoru Polad Aslanov iyunun 12-də saxlanılıb. Növbəti gün məhkəmə onu 4 ay müddətinə həbs edib. Ona qarşı CM-in 274-cü maddəsi (dövlətə xəyanət) ilə ittiham irəli sürülüb. İstintaqı Dövlət Təhlükəsizliyi Xidməti aparır. Oktyabrın 5-də jurnalistin həbs müddəti daha 4 ay uzadılıb.
Yerli və beynəlxalq təşkilatlar Polad Aslanova qarşı cinayət təqibini pisləyiblər və hesab edirlər ki, onun həbsinin əsl səbəbi jurnalist fəaliyyəti ilə bağlıdır.-21B06-
-
- Siyasət
- 14 Oktyabr 2019 20:17
Cəmiyyət
-
Bazar günü, iyulun 28-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı gözlənilir.
-
Bakı şəhəri ərazisində qanunsuz miqrasiyaya qarşı mübarizə çərçivəsində müxtəlif ünvanlarda əməliyyat tədbirləri həyata keçirilib. Daxili İşlər Nazirliyindən verilən məlumata görə, Baş Dövlət Yol Polisi İdarəsinin qanunsuz miqrasiyaya qarşı mübarizə idarəsinin əməkdaşları tərəfindən Azərbaycan ərazisində yaşamaq və qalmaq hüququ verən sənədləri olmayan 34 əcnəbi müəyyən edilərək saxlanılıb.
-
Azərbaycan Müdafiə Nazirliyi (AMN) iyulun 25-də bəyanat yayaraq son günlərdə Ermənistanı Kəlbəcərdə ağır silahlar, Tovuz istiqamətində isə kvadrokopter tətbiq etməklə ona qarşı “təxribatlar törətməkdə” günahlandırıb. Üstəlik, Ermənistanın Qərb ölkələri ilə hərbi əməkdaşlığından narazılıq və narahatlıq ifadə edib.
-
Daxili İşlər Nazirliyinin Baş Narkotiklərlə Mübarizə İdarəsinin son əməliyyatları zamanı narkotik maddələrin qanunsuz dövriyyəsilə məşğul olan mütəşəkkil dəstənin 5 üzvü - əvvəllər məhkum olunmuş Bəhlul İsmayılov, Röyal Əliyev, Xəyal Alıyev, Samir Ağayev və Əli Məmmədli saxlanılıblar.
Rəy yaz