AXCP fəalı aclığı davam etdirir (YENİLƏNİB)

Binəqədi rayonundakı Müvəqqəti Saxlanma Təcridxanasında saxlanılan Xalq Cəbhəsi Partiyasının fəalı Füzuli Hüseynov aclığı davam etdirir. Bu haqda AXCP məsulu Ramiz Kamal “Azadlıq” radiosuna bildirib.

Bu gün F.Hüseynovla görüşmək üçün təcridxanaya gedən R.Kamala görüş verməyiblər. “Polislər mənə bildirdilər ki, F.Hüseynov aclığı davam etdirir, görüş verə bilmərik, ancaq yaxınları görüşə bilərlər”, - R.Kamal bildirib və qeyd edib ki, apardığı yemək bağlamasını da qəbul etməyiblər.    R.Kamal nə qədər səy göstərsə də polislər ğörüşə imkan verməyiblər. “Mən polislərə bu adamın ölə biləcəyini deyəndə polislər də mənə “biz işimizi ehtiyatlı tutmuşuq, qida qəbul etmədiyini aktlaşdırmışıq”, - R.Kamal durumu anladıb. R.Kamal fevralın 5-də də qida apardığını amma yenə də qəbul olunmadığını söyləyib.

Buna qədərsə sədr müavini Nurəddin Məmmədli, F.Hüseynovun fəalı olduğu Xətai rayon təşkilatının rəhbərliyi fevralın 4-də  ğörüş məqsədilə təcridxanaya getsələr də buna imkan verilməyib.

 “Azadlıq” radiosuna açıqlama verən AXCP sədrinin müavini Nurəddin Məmmədliyə görə, F.Hüseynov təcridxanada zorla qidalandırılır.  “Güman edirəm ki, buna görə Füzuli Hüseynovla görüşməyə qoymurlar”, - N.Məmmədli qeyd edib.

Yanvarın 27-də Abşeron Rayon Məhkəməsi AXCP Xətai rayon təşkilatının fəalı Füzuli Hüseynovun barəsində  polisə müqavimət ittihamı ilə 30 sutka inzibati həbs cəzası qərarı çıxarıb. F.Hüseynov həbsə barədə qərarı əsassız sayaraq aclıq aksiya keçirir.  N.Məmmədli F.Hüseynovun inzibati həbsinə səbəb kimi sosial şəbəkələrdəki fəaliyyətini göstərib.-05B-

2016 Fevral 06 (Şəmbə) 14:31:19

Azərbaycan Xalq Cəbhəsi Partiyasının (AXCP) fəalı Fizuli Hüseynov Binəqədi rayonundakı Müvəqqəti Saxlanma Təcridxanasında aclıq aksiyası keçirir. Bu barədə Turan-a AXCP sədrinin müavini Nurəddin Məmmədli bildirib.

Yanvarın 27-də Abşeron Rayon Məhkəməsi AXCP Xətai rayon təşkilatının fəalı Fizuli Hüseynova polisə müqavimət ittihamı ilə inzibati qaydada 30 sutka həbs cəzası kəsib. Onun sosial şəbəkələrdəki fəaliyyətinə görə həbs olunduğu ehtimal edilir.

Nurəddin Məmmədlinin sözlərinə görə, təcridxana rəhbərliyi onu F.Hüseynova aclığı dayandırması üçün təsir etmək məqsədilə təcridxanaya dəvət edib. 

“Lakin məni rəis qəbul etmədi. Rəsiin köməkçisi mənim daha lazım olmadığımı dedi. Aclığa nə vaxt başladığı və səbəbləri barədə məlumat ala bilmədik. Fizuli Hüseynovun sağlamlığında ciddi problemlər olduğundan evdən yemək aparırlar. Təcridxanada yeməyi də qəbul etmirlər, deyirlər aclıq edir. Mənə bildirdilər ki, həkimlər dəvət ediblər, narahatılığa əsas yoxdur”, - o qeyd edib.

N.Məmmədli hesab edir ki, F.Hüseynova zorla qida qəbul etdirirlər: “Güman edirəm ki, bu səbəbdən də məni Füzuli Hüseynovla görüşdürmədilər”.

N.Məmmədlinin fikrincə, F.Hüseynov qanunsuz həbs edilməsinə etiraz olaraq aclıq aksiyası keçirir.-03B-