AXCP fəalı həbs edildi (YENİLƏNİB)

Nərimanov rayon Məhkəməsi Azərbaycan Xalq Cəbhəsi Partiyasının (AXCP) Gənclər Komitəsinin üzvü Turan İbrahimi inzibati qaydada 7 sutka həbs cəzasına məhkum edib. Hakim Rəşad Abdullayevin sədrliyi ilə keçirilən prosesdə AXCP fəalı İnzibati Xətalar Məcəlləsinin 310.1 maddəsi (polis işçisinin qanuni tələbinə qəsdən tabe olmama) ilə təqsirli bilinib. -03B-

2016 Yanvar 14 (Çərşənbə) 02:30:13

Azərbaycan Xalq Cəbhəsi Partiyası Gənclər Komitəsinin üzvü Turan İbrahim yanvarın 13-də gecə saatlarında işdən evə gələrkən yaşadığı binanın qarşısında polis tərəfindən saxlanılaraq Nərimanov Rayon Polis İdarəsinin 17-ci polis bölməsinə aparılıb. Bu barədə Turan-a T.İbrahimin əmisi Həsrət İbrahim bilidirib.

H. İbrahim T. İbrahimlə görüşüb. Turan bildirib ki, onu polisə müqavimət göstərməkdə günahlandırırlar. “Mən onlara deyirəm, harada və hansı polis əməkdaşına? Axı belə bir hadisə olmayıb. Polis soruşub, Turan kimdir. Mən özümü polisə təqdim etmişəm və bölməyə gəlmişik”, -H. İbrahim Turan-a isnadla bildirib. 

Müxalifətçi gənc gecəni polis bölməsində keçirib. Güman edilir ki, bu gün Nərimanov Rayon Məhkəməsinə göndəriləcək.

Xatırladaq ki, Turan İbrahim hazırda həbsdə olan AXCP Rəyasət Heyətinin üzvü Məmməd İbrahimin oğludur.-03D-