Banklar dollar və avro satmaqdan imtina edir (YENİLƏNİB-FOTO)

Cümə axşamı günün ikinci yarısında Bakıda, demək olar ki, heç yerdə leqal olaraq dollar və avro almaq mümkün olmayıb.

Səhərdən xarici valyuta satan Azərtürkbank “gündəlik limitin tükənməsi” ilə əlaqədar satışı dayandırıb. Valyuta almaq istəyənləri yanvarın 15-nə növbəyə yazıblar.

Pasha Bank yalnız bank müştərilərinə dollar və avro satıb.

Yapı Kreditdə xarici valyutanın nə alışı, nə də satışı olmayıb.

Digər banklar dollar və avro alıblar, amma satmayıblar.

Bu zaman nə kommersiya bankları, nə Mərkəzi Bank baş verənlərin səbəbi ilə bağlı açıqlama vermir.

AMB inandırır ki, bankların infrastrukturu: baş ofislər, ölkədə olan minlərlə filiallar və şöbələr əhalinin valyuta tələbatını təmin edəcək. Amma əslində bunun əksi baş verir, demək olar ki, heç yerdə valyuta almaq mümkün deyil.

Ekspertlərin fikrincə, hakimiyyət sadəcə olaraq AMB-nin ehtiyatlarının kəskin şəkildə azalması ilə əlaqədar satışı dayandırmağı qərara alıb.

Azərtürkbank vasitəsilə məhdud satışa gəlincə, bu bank dövlətin nəzarətindədir və orada dolların qara bazara və xaricə axınının qarşısını almaq daha asandır.

Öz növbəsində, AMB resurslarına çıxışları olmadığına görə kommersiya bankları sadəcə olaraq manatın ucuzlaşması fonunda gözləyirlər və neft qiymətlərinin getdikcə azalması fonunda öz valyuta ehtiyatlarını xərcləmirlər. -16D-

2016 Yanvar 14 (Cümə axşamı) 12:13:22

  “AzərTürkbank” hazırda yeganə bankdır ki, əhaliyə dollar və avro satır. Halbuki, ölkənin Mərkəzi Bankı bildirib ki, kommersiya bankları, onların filialları və şöbələri ilə yanaşı mehmanxana və aeroportlar, həmçinin xarici qonaqların gəldikləri turistik obyektlər də xarici valyutanın alqı-satqısı olacaq.

Valyuta mübadiləsi ilə bağlı əməliyyatların artması ilə əlaqədar Mərkəzi Bank kommersiya banklarının əməliyyatlarının effektiv və operativ idarə olunması, əməliyyatların üzərində nəzarətin gücləndirilməsi və xərclərin oprimallaşdırılması üçün mübadilə məntəqələrinin fəaliyyətini dayandırıb”, AMB-nin məlumatında deyilir.

Yanvarın 14-də səhərdən yüzlərlə adam valyuta (500 dollardan çox olmayaraq) alışı üçün növbəyə düzülib.

Bankın saytındakı elana görə, dollar alışı 1 dollara görə    1. 60, satış isə 1. 6320 təşkil edir. 1 avro 1.6850-a alınır, 1.7780-a satılır.

“Biz saat 6:00-da bura gəlmişik və növbəyə yazılmışıq. Bankın əməkdaşı şəxsiyyət vəsiqələrimizin surətini çıxararaq bizə nömrə verib”, - növbədə dayanan vətəndaşlardan biri Turan-a deyib.

Polis vətəndaşları əhatəyə alaraq içəri bir neçə nəfəri buraxır.

2,5 mln.-dan çox əhalisi olan paytaxtda xarici valyutanın satışının nədən ancaq bir bankda olduğunu heç kim açıqlamayıb. Ancaq bunun nə qədər belə davam edəcəyini də kimsə bilmir.

Bu arada dəmiryolu vağzalında “qara bazar”da canlanma var. Dollar 1.62 manata alınır, 1.85 – 1.90 manata satılır. -02D-